李治廷不愛媚娘迷辣跑

李治廷（Aarif）憑着內地電視劇《武媚娘傳奇》（港名《武則天》）人氣急升，劇中他飾演的角色李治皇上深愛着范冰冰飾演的武媚娘，幾乎是不愛江山愛美人。但現實生活中讓Aarif迷得神魂顛倒的卻是絕版古董跑車，而並非甚麼絕色美人。訪問當日他就駕駛了他的保時捷911跑車出來，帥氣十足。Aarif說：「架車我買咗兩年，之前已經沉迷呢個款式，最初係我表姐夫玩，跟住我就開始研究，鍾意佢背後嘅歷史，好有代表性，睇到嗰個時代跑車嘅文化，終於有日緣分畀我遇到佢，覺得好合眼緣。我好享受駕駛住佢嘅感覺同樂趣，依家啲新車都比較易控制，駕駛者本身真正嘅能力唔係咁重要，唔似得呢啲舊車款，係會令到駕駛者有情緒。佢好難駕馭，一定要打醒十二分精神，我感覺佢好似有靈性咁。最驚險一次係有次落雨突然架車失控係咁打白鴿轉，都幾恐怖。」

自認病態復古車迷

他又表示：「我係一個復古車迷，直情覺得自己有啲病態，一收工就會上網睇車，仲要忠心到淨係睇呢個款，想買第二架。我好享受揀車，鍾意個過程。我考慮咗咁耐先買係因為我係一個使錢好小心嘅人，要諗過度過計過瞓醒幾覺都仲係好鍾意，真係覺得值得先會買，但請人食飯我就唔會諗。」

李治廷直言享受駕駛這輛跑車時的樂趣。	劇中的李治對武媚娘情深一片。	機會在哪就去哪，是李治廷今天的寫照。

不少人認為駕駛靚跑車可以吸引女生，甚至追女仔也容易些，對此Aarif說：「我發現一個好得意嘅現象，靚車通常都係吸引到男仔去睇，好少吸引到女仔，所以係幻覺嚟，真正吸引人嘅唔應該係部車，而係個人本身嘅性格同本質，自己好清楚擁有呢部車純粹係為自己開心，喺內地工作太耐都會掛住佢。」

由被照顧到照顧人

Aarif近年在內地發展相當不錯，人氣愈來愈強勁，工作忙個不停，提到他有份擔綱演出、與林志玲等合作的內地真人騷《花漾姐姐》，Aarif對拍攝過程直言：「梗係好攰啦！內容好真，我哋係廿四小時拍攝，有兩組人一齊拍，啲鏡頭避都避唔到。呢次係好好嘅經驗，對演員係好寶貴好赤裸嘅自我發掘，無得掩飾，係最真嘅自己。發覺自己唔係想像中咁唔識照顧人，一直喺屋企我都係個少爺仔咁，習慣畀人照顧，但我並唔想成為一個咁樣嘅男人，都想可以照顧到人，而今次我嘗試去照顧人，可以話係PR加助手嘅混合體，今次之後都養成咗比較識得照顧人嘅習慣。」

他目前正投入內地另一個運動真人騷的拍攝工作，與容祖兒、陳妍希等合作，進行多項運動比賽挑戰體能，過程雖然辛苦但卻難不倒Aarif，他說：「自己有做開運動同training，好鍾意，想身體、體能同埋運動反應好就要付出。全靠意志力和體力去完成挑戰，本身都鍾意健身同做運動，連工作上嘅專注力同意志力都強咗。」

恨武打操八嚿腹肌

現在大部分時間都要留在內地工作的Aarif認為在香港和內地拍戲其實沒有太大分別，最主要反而是飲食方面不習慣：「喺香港食飯盒都唔係一件苦事，有快餐文化，內地啲嘢食口味好唔同，北方食物就偏鹹同油。」目前主力於影視方面發展的他想嘗試做武打演員，且努力裝備自己：「依家我邊拍戲邊做training，同埋配合好strict嘅diet，一個月已經操練出八嚿腹肌。」至於是否主力發展內地市場，他就坦言覺得演員其實很被動：「機會喺邊度就去邊度，《武則天》套劇可以喺香港播我都好開心，可以同香港嘅朋友分享，試過有個貨車司機見到我就走埋嚟，話『皇上我撐你！』」

珍惜與范冰冰情誼

提到他與范冰冰的緋聞，雖然冰冰已公開與李晨拍拖，但Aarif依然珍惜和重視與冰冰的情誼，他說：「我哋大家都清楚大家，演員喺螢幕上一定要有火花，我哋私底下係好close嘅好朋友，佢係我好珍惜嘅人，佢嘅開心同幸福對我嚟講好重要。如果有日我搵到一份我覺得好值得同大家分享嘅愛情，而對方又同意嘅話，唔排除會公開，睇對方意願。目前全力專注事業先，自己歌手出身都會歌癮起，所以如果啲電視節目、劇集或者電影有得畀我唱主題曲或者插曲，我會好開心。」

藝人經理人似情侶

Aarif所屬黎明旗下經理人公司，早前相繼有藝人約滿離巢，外界也一直有傳Aarif亦有意離巢，對此他曾回應表示黎明是他的伯樂，這次再問及他的去向，他說：「公司有藝人走其實我冇乜大感覺，大家感情已經好似一家人咁，即使唔喺同一間公司關係都好close，走咗都可以返嚟，我哋好似兄弟姊妹咁，就好似哥哥畢業去咗美國發展，家人永遠係家人，喺心入面唔會變。我離約滿仲有一段時間，最近好忙冇諗去向，要開始諗吓自己未來嘅方向想點行，事業方面應該點規劃；藝人同經理人關係就好似情侶咁，好講緣分，生命中咩人喺咩時候出現都係緣分，緣分係雙面刃，可以令人一齊亦可以令人分開，我會尊重緣分，隨天意。」

採訪：張嘉敏

攝影：吳文聰

化妝：Bill Chan@A&V Makeup School