邵珮詩 王卓淇 姿采人生

邵：邵珮詩 王：王卓淇

邵：當日參選港姐係對演藝業有興趣，讀大學時我有修讀電影課程，亦有做過舞台劇，發現有呢方面興趣，希望可以繼續發掘呢個興趣。參選港姐係一個入行途徑，依家我仲有修讀演藝班，我比較想試吓拍劇，可以試吓唔同造型同做戲嘅情緒表達。我將會有主持節目做，識廣東話、普通話、英語和日語都有幫助。

「秋生話我癲癲地」

王：反而我冇諗過入娛樂圈。由細到大只係幻想自己做中環OL，有一份穩定工作。但媽咪話我成世人都係讀書和考試，不如搵啲嘢挑戰自己，生活上都想搵啲刺激，所以就參選港姐。獲得名次係一個bonus，入咗無綫先令我發現演藝人嘅樂趣。為咗未來嘅發展，我跟過黃秋生、甄詠蓓學戲，希望喺學習過程搵到自己方向，發現到自己都唔知嗰一面。秋生都話我癲癲地，話有啲外星人氣質可做搞笑輕鬆，但佢都發現我有陰暗面好有攻擊力，話我個人都好有趣，既然行咗呢條路，趁後生想試多啲睇吓有冇機會拍劇。

王卓淇（右）、邵珮詩選港姐寫下不一樣的人生旅程。	左起：王卓淇、邵珮詩與何艷娟是2014年的港姐三甲！	邵珮詩、王卓淇（右）眼前風景一片美好！

邵：如果當日冇選港姐，你估你依家會做緊咩？

邵珮詩有望做佘詩曼第二。	邵珮詩曾奪花式溜冰冠軍。	王卓淇

王：我一定係一個普通OL。每日着住套裝、拎住杯咖啡喺中環行嚟行去，係咪好無聊呀？所以依家我嘅生活係完全超出我想像。呢一年令我嘅人生增添好多色彩，所以我一定會幫手宣傳招募新一屆港姐，港姐令一個女仔嘅人生增添一段美好旅程。

邵：我就可能會係繼續讀書，因為我對心理學好有興趣。所以如果出嚟做嘢，都應該係做心理學家。

王：其實當選至今我學到好多新事物，你覺得有咩得着？

邵：當選後參加過好多慈善活動、國際性選美，我亦有學跳舞、唱歌，遲啲若有機會都想做歌手，哈哈！我喺演藝班課程中搵到自己嘅特質，希望可以再做得放啲，因為有港姐名銜一般都唔敢「太放」，我就想可以畀人了解我多啲。

港姐都係普通人

王：當選後我都參與咗好多慈善活動，知道世界上有好多人需要幫忙，同埋香港原來有咁多慈善組織幫緊社會上有不同需要嘅人，自己眼界都闊咗。我想畀時間發掘自己，女仔青春時間有限，想知自己潛能去到邊，我會「隨緣」但唔代表「消極」，自我增值之餘，有時機就捉住，努力之餘要平常心。

邵：港姐都係普通市民，都會同平常人咁做一樣嘅事，港姐都會搭公共交通工具，我仲鍾意喺街邊買雞蛋仔食。試過遇到唔識嘅人，佢哋都係善意嘅，有人讚我真人靚啲、瘦啲，好事吖，冇咩好怕。

王：係，港姐都係普通人，會搭公共交通工具，不過好少人認得我，試過有人話我上鏡同真人有距離，上鏡平面啲、真人立體啲啩，對我嘅評價都係正面嘅，好多謝佢哋。我都有食街邊小食，但當然儀容要小心啲。

邵：其實我覺得靚嘅準則人人不同，我覺得女仔最重要有自信、有愛心，咁嘅女仔係最靚嘅，行出嚟已經有一種不同感覺，每個人都有不同特質，內在和外在都要靚。

王：我覺得努力嘅女仔先係最靚，社會上好多女仔又青春、又靚，但我認為女仔要多啲奮鬥心。好似我哋選港姐，「樣」並唔係唯一，個人性格和待人接物都好重要。

男朋友？hold住先

邵：你畀我印象好有幽默感，你成日講笑話，所以成日聽到好多笑聲，感覺你係一個好活躍嘅女仔。

王：我覺得你笑容好可愛，好有真誠感覺。你個笑容好有感染力令到大家都好開心，我仲記得你買咗好多羊公仔送畀我哋迎接羊年。其實你依家有冇拍拖？好多人都話做港姐任內唔可以拍拖，我都覺得呢個係取捨，我好想趁後生拚搏，想自己試吓趁後生行到幾遠。拍拖係好美好嘅，亦好期待，但呢個階段試吓生命中另外一些機會。

邵：男朋友之前都有過，依家係專注工作階段。呢啲事遲啲先啦，順其自然。依家識咗好多朋友、又有家人支持，唔需要單依靠一個人。其實都感覺到都有人追嘅，大家做住朋友先啦！

王：其實歷屆香港小姐當中，我比較喜歡胡杏兒。佢當年係季軍，佢一當選就覺得佢個character好突出，佢第一部劇做一個智商低嘅女仔，看過佢演出就更加鍾意佢。

杏兒阿佘為榜樣

邵：我就比較鍾意佘詩曼，佢出道時好似我把聲咁，好嬌俏。見到佢努力做每一個角色，喺《使徒行者》入面做嗰個男仔頭臥底，演得好好。我都希望自己努力後有佢咁好成績。

王：去年港姐陳凱琳和蔡思貝喺《四個女仔三個BAR》同《衝線》都做得好出色。咁唔會令我哋之後演出有壓力，反而多謝佢哋做得咁出色，兩劇好睇又有口碑，係鼓勵公司去用更多新人，我哋都係新人，佢哋兩個起到帶頭作用，起用新人係一個未來嘅趨勢，觀眾鍾意新鮮臉孔。

港姐愛打機

邵珮詩和王卓淇均為家中「獨女」，多謝家人支持對理想的追求。邵珮詩坦言自己比較好動，自細喜歡運動的她最愛運動包括打排球、溜冰、賽跑和跑馬拉松，2002年更在溫哥華參加花式溜冰比賽奪得冠軍。她說：「我父母都好運動型，佢哋都鍾意做健身，爸爸更曾經代表香港參加越野單車比賽。」閒時她亦喜歡在家中打機自娛，近期更愛上遊戲《FINAL FANTASY》。

王卓淇亦是愛打遊戲機的「宅女」：「近期都買咗好多新遊戲，我比較鍾意打GTA，同埋啲暴力少少嘅遊戲。其實港姐都可以打機啩？」

姓名：邵珮詩（Veronica）

三圍：34-24.5-35

出生日期：1990年4月30日

學歷：Simon Fraser University 心理學系學士畢業。

威水史：2012年溫哥華華裔小姐亞軍、2014年香港小姐冠軍、最上鏡小姐、友誼小姐、2015年國際中華小姐亞軍

姓名：王卓淇（Erin）

三圍：31.5-22.5-33

出生日期：1991年6月26日

學歷：University Of Surrey Master Of International Business Management

威水史：2014香港小姐亞軍

文：影視組

髮型：（邵珮詩）Match Tong @ HAiR、（王卓淇）Haysses Ip @ HAiR