《東網巨星》頌父親 盡訴心中情
爸爸，父親節快樂！每人心目中都有不一樣的爸爸，娛樂資訊App《東網巨星》推出「巨星最愛-父親節篇」，紅星們透過《巨星》向至愛的父親，盡說心底話。
劉青雲：我最愛嘅係我爸爸，當年係佢叫我讀訓練班，爸爸畀我感覺好嚴格，細細個已經好怕佢，我知佢好錫我，到今時今日能夠喺電影有成就，覺得好激動，諗番如果唔係爸爸，我都未必入行。
方中信：我最愛嘅人我爸爸，因為佢教我好多人生道理，做人一定要真誠，唔好對朋友講大話，雖然爸爸有啲蠢蠢哋，但佢教我嘅嘢，令我喺呢個圈做到咁多年都交到朋友，朋友亦對我好真誠。
蔡穎恩：爸爸好錫我同我妹妹，令我無憂無慮咁生活，我知佢身體唔好，所以我想話畀佢知，I Love You Daddy!
洪卓立：我爸爸係好少講嘢嘅人，但佢好錫我哋，我爸爸好少朋友，但大個發現原來爸爸係覺得識朋友要應酬，應酬就要使錢，佢情願慳番啲錢畀屋企。
蔡思貝：喺我24年嘅人生裏面，我愛嘅嘢有好多，但最愛都係爹哋媽咪，如果冇佢哋就冇我，佢哋畀好大自由度我，又供我去外國讀書，認識呢個世界。
莊思敏：我最愛就係我爸爸媽媽，因為有佢哋先會有我，我要多謝佢哋將我養到咁大，非常感激！
姜麗文：我最愛就係爹哋秦沛，我要多謝佢好尊重我所做嘅選擇，最有印象係我同哥哥自資做歌手，當時佢好唔開心，但當佢見到我哋努力做音樂，最後都明白晒！
蕊蕊：爹哋好錫我，次次都維護我，連考試唔合格，都係佢幫我簽名，瞞住媽咪。依家就算幾唔得閒，我都會陪佢過父親節！
趙茜：細個我想學體育，但媽媽不同意，爸爸就說讓我學。後來有人找我做模特兒，媽媽不同意，爸爸就說帶我去面試。爸爸說無論我想做甚麼，他也會支持我。
周國豐：我最愛係我爸爸（周啟邦），雖然依家佢唔喺我身邊，但我無時無刻都掛住佢。我依家做咗人父親，對爸爸嘅教誨開始明白，但為時已晚，好可惜，我會將佢嘅教誨傳畀下一代。
洪杰：我冇兄弟姊妹，爹哋媽咪知我鍾意唱歌，佢哋就畀唯一呢個仔返香港完成夢想，所以我好想講I love you。
黎虹讌：我做咩事爸爸都咁包容我，爸爸年紀愈來愈大，但仍然咁寵愛我，好想多謝爸爸。