傅嘉莉掟6位數搵辣男友
對車情有獨鍾的藝人傅嘉莉，昨日出席名車旗艦陳列室開幕禮，18歲已考獲車牌的她很享受駕駛過程，認為女性揸車特別有型，準備豪花六位數字買辣跑代步，還笑言：「dream car將成為我的男朋友。」
傅嘉莉（Kelly）昨日身穿橙黃色低胸長裙出席「瑪莎拉蒂全港最大旗艦陳列室開幕典禮」，還跟陳列的跑車合照，大騷事業線及長腿，十分吸睛！她說特意與形象師一起挑選這套服裝來配襯這部香檳金色跑車，真有心思。
補鐘學車遇險
18歲即考獲車牌的Kelly，非常喜歡駕駛的感覺：「雖然我已經考到車牌，但好少揸車同生疏咗，最近好想買車，專登請咗個私人導師補上十六堂課，上咗十堂，每次都揸個幾兩個鐘，游走半個香港。但上次揸上山時，因為多彎位，差啲發生意外，嚇到導師即刻搶我軚盤煞停架車。」雖然如此，但她依然會揸車，並說：「我好享受揸車，覺得女仔揸車好型，仲好有樂趣！」投資有道的Kelly有信心可盡快買到dream car：「諗住買部四門歐洲跑車，預咗六位數字，仲會買重保險。」
新發展新方向
早前Kelly專注拍攝電視劇，未來她的事業發展方向會有所改變：「我除咗學緊騎馬，下半年會去北京電影學院跟教授學戲、操演技同學武功。（想做打女？）好開心去到內地有人覺得我適合做打女，會上速成班做啲手腳操練。」忙於工作搏殺的Kelly表示暫時未有想到感情方面：「寄情喺車，車就係我男朋友，以前都唔明男人點解話車係第二個老婆，依家明啦。（你都控制唔到架車！）揸車就好似感情咁，要互相遷就。」
文：名人組