發哥專利自拍神器 周秀娜恨要

周秀娜：「我愛發哥型英帥靚正！我鍾意發哥佢會去買餸，好親民，同埋會搭港鐵！」

發哥：「喂！香港廣大市民都好鍾意搭港鐵，個個都去買餸喎！你都鍾意晒喎娜姐！」

周秀娜向發哥偷師自拍秘技。

周秀娜自言雙手不及發哥長，未能成為自拍神器。

周秀娜：「點同呢？邊有咁高呢？我想問發哥平日最叻整咩食？知你會去街市買餸，會唔會自己煮嘢食？」

發哥：「舊時就會，周太霸佔個廚房之後，將我趕出廚房之後，我依家十指都不沾陽春水，依家我唔會煮喇！出去買番嚟食就算喇！因為個廚房畀人霸咗，陰功！」

周秀娜：「咁呀？我淨係睇住你喺廚房都ＯＫ喇！或者我哋就咁坐喺度都ＯＫ！我知你好高，手好長，但都想知你有冇自拍神器？」

發哥：「呢個自拍神器唔使喎！佢唔硬，好夠柔軟，角度比支棍更好，因為你一隊到咁遠嘅時候，你前面好空呀！我呢個自拍神器呢又挑得，又Shift得，正好多o架！不過冇得賣吖，得一支。呀！有兩支，左一支右一支，冇咩人好似我隻手咁長，得兩支，註冊咗，發記自拍神器。」

下廚煮「潮」菜

得知發哥不入廚房，娜姐即笑言會增進廚藝，一於炮製潮州菜及蛋糕冧偶像，她說：「多謝！多謝發哥！我好開心，你抽中咗我！我知一定係篩選制，你抽中咗我，我唔理，我知一定係咁！你唔煮嘢食唔緊要，你唔沾洋蔥水（陽春水），由今日開始，我就去學煮嘢食，呢排我學識咗整蛋糕，唔同款式嘅。如果你想煮中菜，我都可以煮，又或者潮州菜，因為我係潮州人！我覺得你個自拍神器幾好，但我都想要一個註冊咗嘅發記自拍神器，因為我隻手冇你咁長！」

文：陳偉立

採：張嘉敏、蔡志豪

攝：秦健輝、唐豁莊、鄭家俊