祖兒克勤望加場還「飛債」

容祖兒與李克勤昨日為攜手合作的《容祖兒李克勤演唱會》舉行記者會，他們獲安排坐直升機抵達尖沙咀會場，非常有氣派！提到演唱會名稱，兩人表示因為有太多選擇，所以遲遲未能落實，克勤更笑說：「頭先搭直升機過時候，見到好多南亞裔人排隊，我打算叫做『南亞大戰姨媽姑姐爭飛演唱會』！」之後台上播放兩人演藝歷程的片段，兩人不禁互相取笑「娘爆」造型。祖兒更自嘲2003年的造型似發水麵包：「嗰時脹晒，依家冇發水喇，收晒水！」其後兩人即場舉行結盟儀式，承諾至演唱會期間會結為「兄弟」，無論唱歌跳舞都會同工同酬，不分你我，再做出結盟手勢。適逢今日為祖兒生日，大會特意準備了蛋糕與她預祝，祖兒許願時，英皇高層吳雨卻突然抵死地說：「祝師兄（男友劉浩龍花名）師姐好！」祖兒即睥一睥對方，場面搞笑！

巡迴騷延「兄弟」情

受訪時，提到兩人的「兄弟」關係只維持到演唱會，祖兒即說：「係囉，心入面有啲唔舒服添！」克勤表示不用擔心，因為之後會有巡迴演出，又呼籲大家不要待演唱會加場才撲飛：「就算真係加都加好少！（好多飛債？）我尋晚（前晚）食餐飯都冇咗一百張！」而祖兒則笑言自己採取來者不拒的態度：「其實係我助手收order嘅，佢叫我唔好再咁喇，我呢種態度會害咗佢！」問到可會考慮開日場演唱會？克勤說：「上次我同校長廿五歲加廿三歲試過兩日做四場！睇吓反應點先啦！」

兩人在機上俯瞰香港景色。	祖兒與克勤合併手掌變成兩人的標誌。	大會播出祖兒與克勤的小時候照片，非常可愛！

提到有指師兄因「污糟論」而被迫停工傳聞，祖兒說：「老闆話今日講演唱會以外嘅嘢就減人工，下次先答！」至於生日願望是否如吳雨所說希望「師兄好」？她賣關子說：「聽日（今日）先答，你哋跟到我我就講！」

文：音樂組　

攝：鄭家俊