沈月陪父歎茶 怕醜偷望

昔日性感女星邱淑貞（豆斗），與擁逾30億身家的時裝店老闆沈嘉偉結婚後，先後誕下三名千金沈月、沈日和沈晨，轉眼間大女沈月已13歲，更遺傳了媽媽的優良血統，樣貌標致，與媽咪成個餅印，被公認為城中美少女。

沈嘉偉偷笑囡囡

日前約下午4時，沈嘉偉與大女沈月現身中環一間酒店High tea，二人有講有笑，感情不錯，但全程未見媽咪豆斗和兩個妹妹。至下午5時半，兩父女醫肚後步出，戴住Cap帽、穿背心、孭住大背囊的沈月與爸爸並肩而行，邊行邊繼續傾偈，只見沈月現已長得跟爸爸差不多高，亭亭玉立。

沈嘉偉也忍不住偷笑。	邱淑貞跟沈嘉偉昨日現身時，否認大肚傳聞。	沈月和沈嘉偉快步上車離開。

二人步往附近停車場外等車，期間突然見到記者拍照，兩父女不約而同用個背脊「得」住記者，但向來害羞不慣面向鏡頭的沈月，又忍不住擰轉頭偷望記者，身旁的爸爸見狀亦不禁偷笑。直至代客泊車把其四驅座駕駛至，父女即快步上車離開。

「提醒我減肥啫」

另外，豆斗與沈嘉偉昨日賀梁朝偉受勳，豆斗主動向記者澄清懷孕之說：「話我老公畀壓力我，佢好可憐囉，佢冇咁做，我老爺奶奶都好好，冇啲咁嘅事。依家科學咁昌明，要搞（追仔）頭一、兩胎都搞啦。我冇BB，可能係大家見到我肥咗，想提醒我減肥啫。」她又謂時間不夠用，擔心忽略女兒成長：「大嗰個青春期嘞，要多啲同佢傾偈，依家唔做，驚佢第時咩都唔同我哋講呀。」

文、攝：追蹤組