偉仔獲法國頒勳章 嘉玲錫晒

入行逾30載的梁朝偉屢獲影帝殊榮，昨日他在本港法國領事官邸受勳，由駐港澳總領事栢雅諾代表，向他頒發「法國藝術與文學軍官勳章」，以表揚他對中法文化交流以及華語影壇的貢獻。據悉，偉仔是首位獲「軍官勳位」的華人男演員，認真威水！偉仔與太太劉嘉玲以黑色情侶裝現身，同行還有偉仔妹妹一家及嘉玲媽咪等，眾好友包括王家衛夫婦、曾志偉、鍾鎮濤夫婦、邱淑貞夫婦、葉童夫婦等現身支持。

今年主力拍喜劇

受勳後偉仔致謝詞表示要與嘉玲及家人分享這份喜悅，台下他受訪時謙稱：「覺得好開心同榮幸，電影唔係一個人嘅，呢個獎係對我拍過嘅香港電影作出肯定。（嘉玲話要好好保護你呢個香港資產喎。）我只不過係香港影壇嘅一分子啫。」月尾生日的他暫未計劃如何慶祝，但談及稍後工作安排即大方透露：「7月前點都去南京開工嘞，依家等緊劇本，想花一個月時間練普通話。預計今年會拍3套喜劇，有動作喜劇、推理喜劇同今次呢套愛情喜劇，冇咁沉重覺得會好玩，但拍喜劇都唔簡單，係一種挑戰。今次唔係王家衛執導，我有信心好快拍完。」活動完結後，偉仔拉隊到君悅酒店宴請親友食意大利餐。

嘉玲還向老公送上香吻。	偉仔獲頒「法國藝術與文學軍官勳章」，認真威水！	王家衛用手機留住值得紀念的一刻。

講嘉玲緋聞得啖笑

而嘉玲一身鑽飾貴氣打扮相當搶鏡，被問到鑽飾卡數時，她笑謂：「呢樣唔緊要，呢個獎大啲。」她直言戥老公開心，但未計劃送甚麼「賀禮」：「大家要好好保護香港嘅資產（指偉仔）。」對於被指「情傾」閨密鄧霓儀，嘉玲說：「我同佢二哥（鄧永鏘）講起都得啖笑。（依家同鄧小姐見面尷尬？）唔會，我暫時性取向正常。」偉仔亦沒將太太緋聞放心上：「得啖笑。我哋喺度咁多年，咩風浪未見過吖？」

志偉到場時發揮搞笑本色。

偉仔媽咪（右三）與嘉玲媽咪（右二）一同見證受勳。

曾志偉到場時發揮幽默本色，反問記者：「偉仔其實攞咩獎？畀佢做乜？（送咩俾佢？）佢送番畀我就真，我哋o黎賀佢喎。」

文：影視組