祖兒為龍解畫：戥佢唔舒服
天后容祖兒和李克勤昨日同以純情學生打扮拍新歌MV，對於男友劉浩龍發表的「污糟手論」近日鬧得滿城風雨，祖兒首度為事件開腔指男友鹵莽，又爆浩龍為此自責了多天，祖兒更代男友求情：「我都有戥佢好唔舒服，希望公眾盡快原諒佢！」
容祖兒和李克勤昨日為合唱新歌《世界真細小》拍MV，兩人穿校服出場，記者叫他們攬攬合照，克勤笑言：「着校服唔好啦，會有BBo架。」講到劉浩龍早前發表的「污糟手論」被插爆不尊重基層人士，祖兒首度為此事回應，透露男友幾日來都很自責：「佢啱啱轉新公司，好多嘢都好順，但呢個錯失就搞到大家對佢有咁嘅評價，大家都好唔舒服，我都有戥佢好唔舒服，希望佢經一事、長一智，畀佢好好嘅教訓。」
坦承男友鹵莽
祖兒謂有跟浩龍分析過，作為公眾人物在網上發表意見要負責任，亦坦承他是次鹵莽：「作為同行，我呢十幾年都喺錯誤中學習，最緊要知道自己犯咩錯，希望公眾盡快原諒佢。」克勤亦幫口謂浩龍已為此事道歉。
浩龍曾自爆有潔癖，問祖兒可會感壓力？她笑言：「真係好大壓力，因為我唔係太齊整。」講到有網民鬧埋祖兒，克勤說做藝人的身邊人，受影響在所難免，最緊要患難見真情。祖兒將生日，她說有些朋友喜歡與她慶祝農曆生日，克勤即玩食字問：「農曆唔係應該同龍（劉浩龍）慶祝咩？」
開騷成身飛債
克勤表示，因唱片公司跟卡啦OK公司的官司問題，今次與祖兒的合唱歌MV會有三個版本，分別是克勤和祖兒各自的單人版以及雙人版。兩人亦謂昨是他們演唱會優先訂票的日子，各自都欠下很多飛債。
文：音樂組