阿YU化妝班畢業學變誇張臉
趙頌茹（阿Yu）早前在陳妙瑛開設的化妝學校上堂，並於昨日出席畢業禮，阿Yu表示想繼續增值自己，要學化誇張的妝容。陳妙瑛則讚阿Yu正能量爆燈，沒被早前的生活挫折擊敗，並透露有意找她任學校的星級化妝師做生招牌，大讚她絕對有潛能擔此重任！
早年淡出娛圈闖商界的陳妙瑛和趙頌茹昨日齊出席BeautyTech化妝學校畢業禮，該校創辦人陳妙瑛表示學校轉眼已成立15年：「以前冇咁多化妝學校，呢間係香港第一間，幾年前仲成為首間政府資歷架構認可嘅學校，我覺得呢盤生意好值得驕傲同好有意義。」
湊女戒緊張
在陳妙瑛的學校學有所成的阿Yu即席為模特兒上妝，盡顯專業一面，她表示對學習其他妝容極感興趣：「依家學嘅係日常生活運用，仲有啲誇張嘅妝容未學，都好想學，又覺得好玩，想繼續增值自己。」
阿Yu續說，以往只專注照顧小朋友，現懂珍惜自己，讓生活過得更充實。問暑假可會為囡囡報興趣班？她表示：「諗住幫佢報游水自救課程，同埋學滑板車，佢踩得幾好。不過我之前都係緊張媽咪，驚佢跌親，但依家知道唔放手畀佢學，佢就學唔識。」
有進步潛力
對於阿Yu揀選其學校學化妝，陳妙瑛謂：「佢好正面，好多人遇到挫折會氣餒同自怨自艾，但佢充滿正能量，希望佢可以學到我哋嘅專業（化妝），我哋又可以喺佢身上學到做人正面嘅訊息。」問會否找阿Yu做生招牌？陳妙瑛稱：「佢今日喺度畢業，我諗嚟緊佢都會參加我哋之後嘅化妝比賽，希望佢會讀埋其他課程。（到時幫你做星級化妝師？）希望啦，對佢前景好之餘，對我哋嘅宣傳都好，我睇到佢呢個潛能。」
文：名人組