子丹甩臼忍痛練琴
甄子丹早前拍《葉問3》時打到甩臼，回港就醫。前晚他以特別嘉賓身份出席音樂夜，負傷與14歲少年鋼琴家李欣潼表演雙鋼琴合奏。子丹透露事前亦盡量抽時間練習：「因為拍緊《葉問3》都係盡量練，之前拍戲傷咗右手，甩咗臼，今晚出o黎係支持。之前隻手腫到好似雞蛋咁大，痛咗5、6日都仲痛，就飛返香港睇醫生。醫生話係輕微甩臼，依家已經退腫，唔痛。我本來都擔心傷咗點同泰臣打。（佢拍晒未？）佢拍晒喇，我仲爭Ending同張晉打。」
由於《葉問》第一、二集口碑好，所以今次他亦期望可以超越：「我同葉偉信仲有成個團隊，都希望可以再創高峰。第三集要有新元素，我每日都會仔細討論係咪做到最好，到目前為止都順利嘅。」子丹又透露暑假已安排時間見小朋友，行程由老婆計劃。