發哥金句頂癮 阿嬌湊熱追問
「神級影帝」周潤發上月登「六」，《東網巨星》炮製的特備節目《我愛發哥》，誠意邀得25紅星與發哥隔空吹水，踏入第三周，頂癮金句繼續連珠炮發，一個又一個神級回覆笑到標眼水！難怪連Twins的鍾欣潼都叫大家快些下載收睇！
鍾欣潼（阿嬌）
大家有冇留意《東網巨星》呢，入面有一個新Column就係叫做《我愛發哥》，有好多Artist都問咗發哥問題，我都有問呀，記住留意《東網巨星》入面《我愛發哥》啦！
張惠雅
嘩！大家有冇留意最近《東網巨星》嘅《我愛發哥》呢？依家有好多巨星都有問問題o架，好似謝安琪、張繼聰同佘詩曼啦，我都好期待發哥仲有咩趣致嘅回答啊，最近留意住喇！
蔡卓妍
《東網巨星》入面嘅《我愛發哥》，入面有好多明星朋友問咗發哥嘅問題喇，咁我呢，當然唔會錯過呢個機會，都有問發哥問題啦，你哋記得留意呀！
第11集：唱歌仔冧暈吳若希
「宅男女神」吳若希問發哥有冇睇佢嘅劇：「你有冇睇TVB套《衝線》？」雖然嗰段時間周潤發忙冇睇，但係佢就唱咗隻歌仔覆Jinny：「不過我有睇過啲Promo，靚仔靚女踩單車踩到去台灣，青春劇，我都好鍾意青春，就好似陳寶珠舊時隻歌咁，青春真可愛青春！」冧到Jinny暈陀陀。
第12集：向Heidi揭黑衫之謎
行山好易捕獲周潤發，組合Super Girls的成員Heidi問佢：「行山咁熱，會唔會試過忍唔住熱到除衫露出好有型嘅『朱古力』？」發哥自揭：「嚇死人咩？我都有個腩o架！我個豬腩仔都唔細o架！所以我着衫成日着黑色，一黑遮三醜。」
第13集：幽張兆輝一默
張兆輝同發哥係好友，張兆輝問點解老友咁風趣，發哥又嚟神回覆：「你要風趣好簡單，買多啲油炸鬼，一定脆！食蔗，又咁脆，食多啲馬蹄爽，又趣，你想風趣，食多啲呢啲食物冇錯，一定脆！脆到你唔識講。」呢句有十個「趣」呀！
第14集：同黃心穎鬥萌？
心穎BB問嘢答嘢向來Cute，佢問發哥：「如果你可以同一個人或者一樣嘢對換身份一日，你會揀咩呢？」發哥就用好萌嘅口音答心穎：「我想做個『開心』醫生，真係劏開個心，幫人搭橋，醫番好人，咁呢個『開心』醫生真係好開心！我想做醫生做一日！」
第15集：請黃翠如食檸檬
翠如BB雖然有男友蕭正楠，但原來都好留意發哥：「發哥就算喺屋企隨便行出嚟都好型！」發哥說：「我邊夠你男友型仔，你兩個行埋又好睇，我不知幾羨慕你，真係男才女貌！」以為發哥會繼續讚？他即反高潮說：「喂！請飲唔好搵我，我唔得閒。」