Bobby經理人反擊樂易玲：係佢親口講！
藝人歐陽震華（Bobby）與無綫合作逾30年，曾拍下多部受歡迎劇集，屢次成功推高收視被封「福將」，近日卻驚傳無綫藝員部不再與他續約！Bobby日前回應指早前拍畢劇集《東坡家事》後與無綫傾續約，但傾到最後一次時，經理人Lydia得到的答覆是「有啱先搵你」，Bobby直認覺得「被放棄」，大嘆感慨良多。有指傳聞震驚無綫管理層，已立即派戲劇製作總監曾勵珍出面談續約兼「救火」，曾勵珍表示不跟Bobby續約並非無綫原意，認為只是言語上的誤會，製作資源部總監樂易玲亦曾否認有人說過「有啱先搵你」這句話。
Bobby力撐：點會唔信佢
對於無綫的反應，Lydia昨日接受電話訪問表示感到被屈，因此有澄清必要：「樂易玲話喺出面傾合約，其實唔係，係上佢辦公室度傾，『有啱先搵你』呢句唔係佢旗下同事講，係佢親口講！呢句嘢就一定唔會係我講啦！我係Bobby經理人，工作上會抽佣，點會唔想佢多嘢做呢？Bobby知道後都有安慰我，仲問我係咪終於明白藝人畀人屈嘅感覺。」對於經理人作出澄清，Bobby認為樂易玲「推莊」這個反應很正常，並力撐經理人說：「我哋合作咗15年，點會唔信佢。（事件影響你兩個關係？）有！感情仲好過以前添！佢份人好忠直。」而本報至截稿前未獲樂易玲對有關事件作出回覆。
