林師傑寫包單 娶硬歐陽巧瑩
前港姐歐陽巧瑩（Tammy）在馬來西亞沙巴經歷地震，僥倖逃過一劫後返港，獲男友林師傑親到機場迎接。Tammy憶述事發後第一時間打給母親報平安，第二個便打給男友。林師傑對於已進駐女友心中「一人之下」的重要位置，不忘作出結婚承諾：「叫佢等多陣，希望唔會好耐。」
藝人歐陽巧瑩（Tammy）與無綫J2台旅遊節目《3日2夜》攝製隊及男主持梁彥宗（Chris），前日在馬來西亞遇上當地42年來最強烈的6級地震，雖然事發時眾人剛好完成在沙巴的拍攝工作，並轉往距離震央約兩小時車程的亞庇，但仍感受到震動，Tammy更直言感覺到死亡。
「我一向都好珍惜佢」
Tammy與死亡擦身而過，僥倖逃過一劫，前晚約11時返港，男友林師傑第一時間親往接機，送上安慰，為女友推行李之餘，又駕車送她離開，細心舉動冧得佳人甜絲絲望到實，Tammy說：「地震嗰刻我喺酒店房化妝，由於太突然，我唔知點做，就跑咗去浴缸避難，仲第一時間打電話畀媽咪，但冇人聽，再打畀林師傑報平安。（點解唔第一時間打畀林師傑？）阿媽重要啲，今次經歷令我感覺好接近死亡邊緣，會更加珍惜眼前人。（同男友感情急增？）我一向都好珍惜佢，同時亦好擔心當地港人同災民安全。」
獲「報平安」反變焦急
林師傑則指接到女友電話時，焦急得不知所措，他說：「我擔心佢返唔到嚟，我指嘅係航班影響下，佢要延遲返港。（佢先打畀佢媽咪再打畀你？）咁做啱吖！（佢話珍惜你？）有人珍惜梗開心，畀到正能量我呀！（加速結婚念頭？）太遠啦，自己都未照顧到自己，有穩定收入同前途先！等我做好啲先可以呀，叫佢等多陣，希望佢等到，希望唔會等好耐！」
梁彥宗則指地震時誤以為自己身體不適，後來聽到門外聲音，才知是地震，他說：「嗰度唔係地震帶，當時我都唔敢相信係地震，不過呢件事唔會令我有陰影，反而日後出外會加倍小心。」
文：影視組