王宗堯張建聲演技開竅 為所獄為
王宗堯與張建聲於電影《壹獄壹世界》由監外鬥到監內，表現出其荒誕、瘋狂的思想和行徑。為配合角色，張建聲於十個月增肥期間反省自己演技不足之處。他與王宗堯均認為演技由外到內再到外，誓要將角色演到最好為止。
王：王宗堯 張：張建聲
唔郁增肥 運動燒脂
張建聲為拍片增肥至二百磅，除了靠不停進食增肥外，最重要就是瞓。他認為增肥難過減肥，因為只要做大量運動便可燃燒脂肪。
張：其實增肥邊有嘢做，係食囉！瞓囉！
王：聽落好似好易。
張：因為你食咗嘢落去，如果你一郁，你就會消耗，咁消耗咗咪要再食過囉！嗰個道理就係要寧願唔郁，不斷反問自己要幾時先肥？就係要睇住個肚腩愈嚟愈大。
王：好似冬眠咁？食咗啲嘢谷晒落去搞到瞓唔着？
張：其實你要計卡路里，你唔可以食一啲少卡路里嘅食物，如果唔係就會浪費咗嗰日。我覺得增肥辛苦過減肥，因為增肥嘅時候你食嘢落去都未必會肥到，食落去可能吸收三成，但其實你已經受咗十成苦。減肥唔同，做大量嘅運動係知道會排番出嚟。
王：我覺得無論增肥、減肥都係一件好難嘅事，因為你係改變咗自己既有嘅形體去做一個角色，同埋我哋依家又唔係後生，所以我好佩服張家輝，佢好樂意地打破自己既有形象去演戲，我覺得呢樣嘢係好難。
張：要由一個唔係好肥大嘅身形操到咁勁，呢個精神係我自己諗落都好辛苦，係超人先可以做到嘅意志力。
王：最開心就係咁樣做演員，挑戰自己。
連場肉搏 逢女讚掂
二人與多位女演員有纏綿鏡頭，王宗堯激讚林芊妤（Coffee）演出夠放，張建聲則欣賞郭奕芯（Ashina）演出時不錫身。
王：都多（異性緣）嘅，始終係網絡小說，多多少少有啲「甜分」（色情成分），個文化係咁，呢啲劇情放晒喺我入獄之前嗰種荒誕嘅生活入面。女性對手包括有崔碧珈、Coffee、李梓言，同埋余安安。
張：仲有Ashina呢！最好就當然係余安安啦！
王：其實我最鍾意係同你，仲有廖啟智做戲。
張：講緊女呀！
王：女呀？我好欣賞Coffee，一來佢自己個人好隨和，同埋佢係一個幾有慧根嘅演員，好難解釋，例如佢好易入戲。
張：即係一點就明嗰啲？
王：除咗呢樣嘢之外，佢有好多佢自己設計嘅嘢擺咗入去，做起戲上嚟係好舒服、有交流。有啲人其實做戲嘅時候好似一道牆咁，永遠跟死自己設計嗰一套，或者有啲人會好緊張佢個表情、個樣肥唔肥咁，好多人都會有呢啲心理障礙或者叫做雜念，Coffee佢冇呢啲，好自然，佢對角色拿捏做得好好。
張：我最難忘係同Ashina，你要諗吓其實佢之前係冇拍過戲，今次係佢第一部就要畀我打，我仲要咁龐大嘅身形，我又唔係動作演員，打佢嘅時候又就唔到力，場戲入面我又要捏住佢條頸，當時佢喺床架，有一次整到佢條腰差唔多瘀晒。
王：真係o架？
張：係呀，有晒啲紅印咁，我覺得佢真係幾有潛質，佢可以應付到好沉重嘅角色。
用心演戲 內外俱備
張建聲入行四年，覺得是時候要蛻變，認為自己之前的演技大有不足，故將累積四年的演出經驗作總結，結果令演技開竅。
王：過去呢一段時間你用十個月去準備呢部戲，好似無端白事開咗竅，搵到個你認為做戲做得舒服嘅位置。
張：可能困咗十個月日日冇嘢做，瞓喺張床度日日諗點解以前做得咁差。
王：其實以前唔係差嘅，好似大家依家見到嘅香港演員咁，普遍嚟講嗰個感覺同埋嗰個用心程度。例如依家睇番無綫重播《大時代》，你會睇到一樣嘅機位，一樣嘅劇情，但佢個內心層次多好多，呢一樣嘢係我覺得最好睇嘅地方，同埋係演員最需要花時間嘅地方。好似一啲鬧人時候嘅情緒，好多嘢係好表面嘅，咁究竟內裏有幾多嘢去support呢？
張：其實你話開竅，我認為係我入咗行四年覺得係時候要有一個總結，真係要有一個蛻變，又或者係累積咗四年嘅經驗，例如講對白嘅力量分布，甚至乎你對角色嘅認知，自己係時候要去認真諗吓。
王：內心好重要，當然外形都好重要，因為外形係一個畀人嘅印象，亦會幫到好多手。所以點解演醫生、專業人士要戴番副眼鏡會變得專業啲。若果演爛撻撻角色，個人烏歪啲、身體肥啲、油啲，咁會令印象深咗，件事會幫到一半以上。另外嗰一半就好靠你個內心，兩樣嘢都難。
自認變態 爭住「入冊」
愛看外國真人騷節目的張建聲，得知新片搞「入冊」真人騷即第一時間報名。但原來睇人好過癮，自己被人睇則有苦自知。
張：其實我自己又衰，好鍾意外國啲節目直播生活嘅真人騷，真係好正，好變態，我鍾意偷窺，淨係望住佢瞓覺我都覺得好正。
王：咁你瞓唔瞓到覺？
張：當我坐第三日嘅時候，我就真係發覺好唔舒服，冇咗私人空間，被人望實你瞓覺、睇書，望住你坐喺度，個壓力真係好大。
王：但你拍戲嘅時候都係好多人望實你o架啦！
張：拍戲嘅時候，Action同roll機係有個時間性。
王：我會覺得做戲嘅時候係好好玩嘅一個解脫，你話係避難又好，只要喺個角色度，我就唔係王宗堯，係個角色，因為做王宗堯嘅時候就係有難題，角色你會好清晰咁知道你要做啲咩，但係做王宗堯嘅時候係冇呢樣嘢，做自己嘅時候會覺得好悶呀。
後記：默契十足 互補不足
王宗堯和張建聲因為多次合作而默契十足，每當對方詞窮時，另一方能即時接上，同時令話題更有深度。記者發現王宗堯無論喺任何話題，總能與演戲拉上關係，表情肉緊。相反張建聲表現較為輕鬆，談演戲時能表現出享受心情。
王宗堯：
化妝：Elaw Wong@Thelool
髮型：阿Hei@Xenter
服裝：CLUB MONACO
張建聲：
化妝：Florey Leung
髮型：Simm Lui@ La mod salon
服裝：CHOCOOLATE@I.T
文：紅樹頭
攝：嚴偉國