藝人黃德斌、翟威廉等昨晚為明珠台節目《葛咸城》宣傳，對於沙巴發生6級地震，曾於菲律賓經歷過餘震的德斌，透露當時下飛機時情況亦相當緊張，他謂：「因為嗰時啱啱地震完，到夜晚酒店仲有餘震，我好驚，即刻叫埋身邊人落街避。今年好多天災，希望唔好咁多啦！」
而早前赴南韓兩個月修讀韓文的翟威廉，透露上月底已返港，當時首爾尚未爆發新沙士疫情，問到可有同學及朋友中招？他說：「學校都冇呢個消息，其實當地都好多中國人喺度讀書，所以我都變咗景點，畀佢哋邀請合照。」
