歐陽巧瑩遇地震 陷死亡邊緣
馬來西亞旅遊熱點沙巴昨早發生6級地震，正在當地拍攝旅遊節目的前港姐歐陽巧瑩，地震時她雖身處距離沙巴兩個鐘車程的亞庇，但一樣感受到震動，從未經歷過地震的她，震到個心離一離，還表示好似同死亡好近咁，不過猶有餘悸的她拍片報平安。
2013年香港小姐友誼小姐得主歐陽巧瑩（Tammy），昨日在馬來西亞首次經歷地震，她與男主持梁彥宗及攝製隊在當地拍攝無綫J2台旅遊節目《3日2夜》，適逢沙巴發生當地42年來最強烈的黎克特制6級地震，事發時Tammy等人雖身處距離地震城市約兩個小時車程的亞庇，但同樣感受到震動。
林師傑擔心女友
Tammy與梁彥宗昨午拍片報平安，片段中兩人均顯得不在狀態，Tammy雖身穿吊帶背心，但看來猶有餘悸，她說：「有朋友知我喺馬來西亞，都好擔心，message我，我都同屋企人講『我平安無事』，拍攝會繼續進行，希望所有受災害影響人士，都能夠平安冇事就最好！」而梁彥宗則簡述地震時情形，他說：「大概早上7點，喺酒店房度feel到搖晃，見窗簾、床都喺度搖，大約維持咗十秒。沙巴唔係經常地震嘅地方，我冇經歷過地震，睇番啲新聞相，見災區都有天花塌下。」
Tammy昨午回覆本報時，已略為定驚，她說：「今朝（即昨早）7點半左右，我喺酒店房化緊妝，突然間搖咗一陣，好驚呀！我咁大個女都未遇過地震，都反應唔切。（市面情況點？）我依家身處馬來西亞亞庇，市面平靜，冇見到有路陷，攝製隊見情況安全，都決定繼續拍。」而她又在Instagram留言感覺到死亡：「第一次感受到地震的感覺，好似同死亡好近咁，成間屋都搖咗好幾吓，好得人驚，希望冇人有事。」
身為Tammy男友的歌手林師傑亦與女友取得聯絡，他說：「佢都幾好彩，震央喺佢尋日（即前日）拍嘢嘅城市，距離佢依家身處嗰度有兩個鐘頭車程。（好擔心女友？）都擔心唔嚟！（驚有餘震？）一路同佢WhatsApp，情況OK，佢今晚返嚟。（去接機？）未知，要接咗阿媽收工先，睇吓點再決定。」
余曉彤逃過一劫
女模余曉彤昨在facebook透露自己上周亦在沙巴，對地震感震驚，她在電話說：「估唔到一個禮拜後發生咁事，希望被困神山嘅人及其家人唔使擔心，一定會吉人天相！」而來自馬來西亞的前華姐楊秀惠，對沙巴地震大感震驚：「睇到新聞嚇親，因同沙巴唔近，所以唔太擔心屋企人。之前睇到話地震魚上岸，都有通知屋企人，希望人人冇事同平安。」並稱不會返馬國探親。得悉家鄉地震的歌手曹格，昨日在社交網呼籲眾人提高警覺：「這只是今天地震之一的地方，接下來全球都要提高警覺了，Sabah不屬於地震區的。」歌手張智成則留言祈求平安。
文：影視組