祖兒母愛大發恨一箭三鵰
天后容祖兒穿上樽領長袖衫在烈日當空下拍廣告，祖兒的對手是來自台灣的四歲半四胞胎小妹妹，為配襯四個孖辮妹，祖兒也紮了一頭小辮子，大晒青春活力。即將踏入35歲的祖兒無懼做高齡產婦，希望可以一擊即中生三胞胎，她笑說：「生完可以收工。」
容祖兒昨日為代言的百老滙拍攝廣告，同場還有首次來港的台灣四胞胎Audrey、Emma、Natalie及Isabelle，亦是她們第一次拍廣告，四孖妹說：「很熱。」母愛大發的祖兒不停氹小朋友玩，熱到香汗淋漓的祖兒說：「有幾套衫，呢件係最樽，不過寧願曬好過落雨要等。（同四胞胎相唔相處到？）唔難相處，係其中一個容易喊，如果生四胞胎係男仔都唔知點算，曳到癲捉唔掂。」她笑言分不到四胞胎，現場靠她們媽媽幫手排位，四胞胎在場又圍住冰箱，不停玩冰，非常搞笑。
難忘霍汶希與孖妹
問到其家族有冇「孖胎」基因？祖兒說：「冇，唯一我識嘅孖胎係Mani（霍汶希）同佢個妹，當年我上英皇見Mani，走嘅時候好驚，因為見完楊生（楊受成）同Mani，點知落到樓見到Mani個妹，當時我唔知佢係孖胎，點解咁似樣，同佢打招呼又唔認人，之後先知Mani係孖胎。」問到想不想生孖胎？祖兒說：「都吃力，怕冇乜時間照顧。（話唔定生三胞胎？）同中六合彩咁。（擔心教唔掂？）冇諗，生咗出嚟就有方法，不過一次過生都有好處，可以收工。」
拚勁與十年前無異
本月16日35歲生日的祖兒表示不擔心做高齡產婦，她說：「依家係黃金時間，自己唔心急，香港都多高齡產婦出現。」她笑言現時心態及工作拚勁似十年前的自己，她說：「呢輪返番去廿幾歲時工作咁瘋狂，所以唔敢諗有小朋友。」隨即透露近日工作排山倒海，忙於在內地做真人騷的她，返港也沒時間休息，豈非沒時間見男友？她說：「大家明白。」
採訪：音樂組