阿Sa搵水喉 踩入fashion界

阿Sa衣着有品味，她笑言都是趁減價時才買衫。

昨日時尚商場舉行開幕活動及酒會，蔡卓妍及潮人黃偉文、馬天佑、前無綫主播周嘉儀與黃紫盈等一同現身，其中阿Sa表示從小就愛設計服飾，更希望可以有自己品牌：「其實有實行緊一啲嘢，我已經設計咗啲辦，打咗價，但成本太高，mark價太貴又冇人買。我都諗緊同阿嬌以Twins名義設計啲嘢，（紀念周年？）都唔係，不嬲都有諗，希望今年可以實行。我需要一個投資者，（叫老闆楊受成打本？）佢食開大茶飯，不過有又唔拘。」她又笑指平日愛趁減價才濕平，問到可會為男友陳偉霆買衫？她即說：「我會幫身邊人買，佢哋都幾信我嘅品味，好似Mani（經理人霍汶希）叫我見到啱就直接買畀佢。」

徐濠縈囡囡識唱老竇歌

此外，潮人徐濠縈就以租客身份現身，她表示剛帶女兒陳康堤聽鋼琴演奏，大讚女兒遺傳了父親陳奕迅（Eason）的音樂細胞：「佢鋼琴有六級，唱歌佢都鍾意o架，呢排Eason喺香港多咗，佢夜晚聽個女彈琴，覺得老懷安慰，（囡囡識唔識唱爸爸嘅歌？）我哋以為佢唔識，但有次同佢去唱卡拉OK，佢原來都識唱幾多，因為每次Daddy演唱會佢都問幾時完？係最唔客氣嘅fans。」她又謂女兒有作過幾首歌，她將其中一首寄給了專業作曲人，笑指可能有一天Eason會有興趣用囡囡的歌。

（左起）馬天佑、阿Sa、黃偉文都是時尚中人。	徐濠縈大讚囡囡有音樂細胞。	前無綫主播周嘉儀（右）與黃紫盈相見歡。

文：名人組