發哥教Fiona 茅招甩身：話帶阿媽去睇醫生
第10集《我愛發哥》昨日在《東網巨星》app播出，大笑姑娘薛凱琪（Fiona）深得男神周潤發欣賞，稱讚她演出「夠癲」！發哥又教Fiona如何逃離被Fans包圍的困境，竟然出動「蛋撻會凍」、「阿媽病咗」等茅招！
近年唱而優則演的Fiona擔演不少類型的電影，原來亦因此而對發哥特別欣賞！她說：「我特別欣賞演員演文藝片又得，演笑片都得！笑片難拿捏好多，發哥係好出色演員，同埋好Nice、好親民！」
發哥：「我覺得你都好得o架喎！你同阿澤一齊有好多火花！我覺得依家你個樣肥番少少好睇啲吖，以前就瘦過頭。你鍾意唱歌又鍾意做戲，我覺得兩方面都非常好，我鍾意！你癲起上嚟幾癲o架！繼續向呢邊發展，幾好玩o架。」
Fiona：「如果有日有一排人排隊同你影相，你會影到第幾個先會走開？」
發哥：「講開又講，早前我買蛋撻上去開會，出到嚟就有成班發哥嘅『捕獵者』想捉住我，咁我開頭都同佢影吓，點知愈來愈多人，於是我話『對唔住咁多位，後面嗰啲我一次過影一張大合照，影晒！你哋自己互相介紹，分番佢。』因為我話啲蛋撻凍咗唔好食，同埋再影我就遲到，下次你出啲茅招都要！你就話唔好意思，我趕住走，帶阿媽去睇醫生，咁咪得囉！」
收「回信」獲益良多
Fiona收到發哥「回信」後非常感動，兼且獲益良多：「好開心，好似我寫信畀發哥，佢回信咁，多謝發哥！聽到發哥讚我嘅任何嘢都好開心，另外今日終於學到，佢哋（粉絲）因為都好鍾意我，全部人影張大合照，佢哋自己拎Contact發番，仲可以識到新朋友添！同埋我想同發哥講，我會永遠支持你。」
文：陳偉立
採：羅宛君、林惠珊
攝：秦健輝、唐豁莊