發哥讚叻撐追夢 鄭俊弘心都甜

發哥：「呢個又係我偶像！」

Fred：「點解我咁愛發哥係因為《英雄本色》，呢套戲影響我好深，我好記得有一次喺銅鑼灣食飯撞到發哥，當然發哥唔知我係邊個，但我梗係識得發哥啦！我仲O住嘴咁望你，但你嘅笑容好親民，仲好似識我咁指住我打招呼，令我個心好甜，更加愛你呀發哥！」

發哥：「我見到你梗係甜啦！你阿媽見到你就更加甜啦！開心到死啦！有個咁叻嘅仔，其實我睇你喺TVB好耐o架喇！你又難得可以屈咗咁耐，都係一兩句對白，估唔到行咗第二條路，我好欣賞你手結他，你嘅唱功、你份人，依家你就好啦，簽咗間新公司喇！希望你繼續將音樂理想、演戲理想發揚光大啦！講真，我細個張相同你有啲似，但我當時係陸軍裝。」

分享演戲經驗

Fred：「你喺《英雄本色》入面嘅Mark哥，究竟角色揣摩過程係點嘅呢？」

發哥：「其實當時係導演自己嘅感受，佢係賦予咗角色好多情感上嘅嘢，導演拍得好，自己又係編劇啦，佢係當事人將呢份感覺、將角色嘅冤屈發洩出嚟，其實我只係借導演嘅內心歷程套去Mark哥度，其實我冇做任何嘢o架，全靠導演，我冇揣摩，佢話晒經過畀我聽，我跟住佢做，就係咁簡單，唔複雜。」

獲得發哥關注，喜出望外的Fred久久說不出話來，他感動地說：「正！好多謝發哥你抽時間答我問題，同埋誓估唔到你會留意我拍劇，會留意我小小角色，一句對白、兩句對白嗰陣，好多謝發哥你欣賞我，多謝你留意我唱歌、彈結他，我一定會繼續努力，會以你為榜樣，我會做到最好！多謝發哥！」

文：陳偉立

採：曹家誠、林惠珊

攝：秦健輝、鄭家俊、李柏儒