祖兒出水芙蓉捱冷浸2粒鐘
容祖兒和李克勤將於九月在紅館「合體」開騷，兩人先後拍攝兩款宣傳海報，繼早前已曝光的黑西裝Chok爆造型，昨日兩人「濕水」海報出場，祖兒穿上性感單肩裝大玩「出水芙蓉」，克勤以西裝晒「罅」，被祖兒取笑為「水邊着」！
祖兒和克勤昨日出席電台訪問，講到唱片公司剛發了拍攝演唱會海報花絮的照片，克勤爆祖兒出動水着，祖兒即笑克勤：「我係水着，佢係水邊着。」克勤笑道：「有嗰啲嘢sale就sale嗰啲，我冇乜嘢sale就着多啲，一個喺泳池裏面，一個泳池外面。」祖兒好sexy？她說：「冇乜嘢好sexy啫！」要出動「水着」祖兒可被嚇倒？祖兒笑言：「有嚇親我呀，明明話個泳池係暖水，但就凍過冰水。」
拍心口嗌凍
在旁克勤笑謂：「搵咗呢個場地好耐，終於搵到個暖水池，點知去到落水咁凍嘅，佢哋先問係咪要開暖水，咁煲煲水都幾分鐘，何況個泳池咁大。」祖兒無奈謂拍了兩小時都是在凍水中度過。問克勤對祖兒水着可有嘢睇？克勤笑笑說：「多多少少啦！」反而祖兒爆克勤有「罅」睇呢！至於拍攝的花絮片段中，見祖兒下身穿上黑色單車褲露小肚臍，不用落水的克勤就坐在池邊，難為落水後的祖兒不停拍心口及喊凍。
為Rundown煩惱
克勤表示現正煩惱演出的Rundown：「依家有1000個構思，咁難得做一次騷，畀觀眾睇多啲我哋平時各自做唔到嘅嘢。」祖兒稱因為有八場，克勤說：「嘩……你想場場唔同Rundown，你嚇死監製，又記死我。」克勤暗笑校長譚詠麟說：「我依家記憶力有啲衰退，唔知係咪多咗同啲記憶力唔好嘅人做騷呢。」問到克勤可會與祖兒勁歌熱舞？克勤笑言：「有呀，佢準備咗一part叫本小利大勁歌熱舞，仲話會搵個排舞老師可以幫我嘅潛能睇上去放大100倍。」
文：音樂組