雨僑認定Mr.威 等做人妻
有人說，女人一生的愛情故事，就是由一個人渣轉投另一個人渣的懷抱。有些好命的女人，懂得盡早擺脫那些衰男人，及時上岸；相反，分分鐘會被耽誤了大好青春。幸好，雨僑是屬於前者。遇過花心賤男、性格浪子，一次又一次捲入三角關係，跌過痛過，最終找到了「Mr.威」。數數手指，雨僑今年踏入三十關口，由少女蛻變成輕熟女，她的愛情故事差不多要埋尾了，目標在36歲前寫上完美結局，就是當個完美人妻。
隔空催婚 目標36歲前
身經百戰的雨僑慢慢知道好的男人可遇不可求，試過為那些愛過的衰男人喊到變豬頭，令美容達人都束手無策。而入行後與羅力威的緋聞傳足五年，雖然二人始終未有將戀情浮面，不過在雨僑的字裏行間，總覺得她在隔空催婚。
我之前拍拖試過好唔開心，咁女仔好鍾意喊喊喊，我有次喊住瞓覺，第二朝我要八點幾起身去划獨木舟，烈日當空，我對眼腫到得番一條線，冇得救！我唔可以抑制自己情緒唔爆發喎，咁唔開心就要發洩嘛，但我做呢行又要有番個樣見人，後來遇到咩情況，我一喊就企喺度，成晚都企喺度喊，唔可以自己畀重心向下。
美容生意投資大
依家拍緊拖嗰個呢，我覺得人大咗，唔會花時間喺啲唔啱自己嘅人身上，所以廿幾歲拍拖開始就會搵個認真嘅人。講到談婚論嫁，其實我每次拍拖都好想結婚，都係認真，如果冇同佢有結婚打算嘅話，我會直接同佢分手，唔會糾纏，但我依家仲未Ready。你問我同羅力威傾過？冇o架，我目標喺36歲之前結婚。至於生幾多個？我覺得開心就得，30幾歲先生仔都唔係生到幾多個啦，生小朋友又要養，買樓難，做嘢又冇基礎，好難有下一代。
我覺得依家事業仲係衝刺中，可能我遲開始出嚟做嘢，想衝刺多幾年。自己嘅美容生意都冇實質計過賺幾多，邊搵邊使，都有七位數字上落。原來數字幾龐大，一開始開網店，我以為係幾萬蚊上落，但依家動不動就七位數，都幾驚心o架。
嘆情場屢遇花心漢
我識嘅男仔，如果人品唔好，唔啱嘅話就會好快分開，反而令你最傷心嘅，通常係最着緊你嗰個人，無奈人與人之間相處總有一啲係容忍唔到對方，某啲性格上唔夾。慢慢就會變到好容易鬧交，人大咗，覺得成日鬧交，離離合合嘅話，呢個人就唔係Right Person。
同埋每次情侶一嘈就冇得贏，鬧交從來都係雙輸，以前遇過啲鬧交精，死都要講最後一句先算贏嗰啲，咁就好痛苦。同佢好嘅時候就好哋哋，但一衰起上嚟，直頭係消磨你嘅人生，後來就會覺得有啲男人好似浪子咁，久唔久就嗌分手嗰啲呢，我就會決斷啲分手。
至於偷食嘅男人，好彩我仲未遇過，因為我覺得偷食嘅定義係個男仔成日同唔同女仔玩曖昧。但我成日糾纏喺三角關係之間，我懷疑男人係可以同時真心鍾意兩個人，因為我已經試過好多次。例如試過同最好嘅朋友鍾意同一個男仔，朋友就冇承認嘅，而我就鍾意得好明顯同好主動，但佢哋後來一齊咗囉。
嗰個男仔都好奇怪，佢會同我出街食飯，ICQ又傾到好夜，又會送張相畀我放銀包，嗰一刻我覺得自己得到全世界，但最後佢哋公開一齊咗，而我同佢哋就連朋友都冇得做。我主動約男仔出街，就係得呢一次，之後都咪搞啦，原來個男仔鍾意我個朋友，仲要之後發現個男仔本身又有女朋友，最後先知自己係佢16個愛人嘅其中一個。
我有個朋友識少少風水命理，指點我迷津，佢話我個相係成日會糾纏喺三個人之間，解決方法就係要搵個年紀大過我好多嘅男仔，一係搵個結過婚嘅。但我接受唔到囉，始終未遇到年紀大而我又鍾意，機會都好微囉。因為我可能工作都好忙，自己又好有事業心，希望對方陪我成長，多過佢都經歷晒呢啲嘢。
後記：希望有歌影代表作
為甚麼會用「完美」兩字來形容雨僑呢？試想想，有樣、有身材、有樓、有男人、有屬於自己的美容王國，這些港女們夢寐以求的，雨僑都在三十歲前一一完成了。幾乎是要風得風，要乜有乜，更好運的是，在演藝事業上遇上了好老闆蕭定一，究竟她還有甚麼未完成的願望？
雨僑說：「坦白講，我今年想做嘅每件事都重質多過重量，好似上年咁，試過拍完啲電影，之後係唔記得自己拍過，一嚟係過咗太耐，二嚟每日都好快就拍完，冇乜好深刻嘅回憶，我想之後無論唱歌定拍戲，都想有好深刻嘅回憶。」
口述：雨僑
筆錄：倪民清
攝影：司徒國榮