樂基兒玩透 拒P場溝仔
名模樂基兒前晚以性感裝束出席時尚派對，她揚言已做足安全措施，謝絕任何走光之嫌，又透露近來勤於做運動keep fit，狀態大勇的她卻堅拒在派對中結識異性！
名模樂基兒（Gaile）、Ana R.、馬詩慧（Janet）與二女王麗嘉（Irisa）、歌手蔡卓妍（阿Sa）、張天愛女兒邢嘉倩、太子珠寶鐘錶主席鄧鉅明等，前晚一同出席伯爵腕錶及珠寶品牌時尚派對，Gaile當晚身穿透視吊帶jumpsuit現身，大騷古銅色長腿和玉背，性感地盡顯美好身段，贏盡鎂光燈的快閃！
Gaile對疑似飛釘笑言自己的衣着並不是那麼性感：「我只是着短褲，都唔係短裙，（真空上陣？）我做足安全措施，唔會走光，唔使擔心。」談到身材比早前fit，她表示自己非常勤力做運動瘦身：「我都係做完運動先嚟呢個活動，（瘦咗幾多磅？）冇磅過，只係想keep住做運動，冇話想瘦幾多，（做咩運動？）踩單車同跳舞。」她又謂不是派對常客：「我一陣都會早啲走，因為聽朝要起身做瑜伽，（會唔會借機識吓男仔？）我好少喺party識異性，多數為工作先去派對，同埋依家都少玩咗，因為大個女啦！」
阿Sa讚男友孝順
阿Sa表示有收藏小量手錶，但絕不算是收藏家，問她是否儲磚頭多？「係啩，同埋我儲開眼鏡同鞋，媽咪有教我買鑽石，婆婆亦有教我買金，（屋企夠位擺？）唔係擺屋企啦，（咁咪好多嫁妝？）唔一定係嫁妝，儲吓錢啫。」談到男友陳偉霆最近買樓成為業主，她開心表示：「恭喜佢，好叻，佢一路以嚟有錢都有買磚頭，（咁儲唔到老婆本？）佢係買畀媽咪o架，好孝順。」
麗嘉唔知爹哋事
另外孖Janet現身活動的Irisa則表示剛從美國回港度暑假，七月便返回當地。談到爹哋王敏德的時裝店生意不太理想，她坦言沒有留意：「佢唔會同我講呢啲嘢，所以唔係好清楚，成日喺我面前都係好開心。」隨後更尷尬表示不知爹哋已發行一張新唱片；而Janet則一直在場內睇騷，沒有受訪。
文：名人組