吳綺莉 機場接卓林回家
吳綺莉（Elaine）昨日現身機場，接瑞士遊學返港的女兒吳卓林回家，她透露母女倆於三星期前見過面，遊學期間囡囡也有傳短訊給她：「你知16、17歲有自己思想，需要協調。（之後會好好溝通？）16、17歲都唔鍾意同媽咪傾偈，我只希望佢唔好行差踏錯、返學正常。」Elaine坦言會回去跟女兒再談，又稱之前因文化差異才引起誤會：「始終兩母女，有乜隔夜仇，要嬲都嬲完。（平心靜氣溝通？）會，小朋友愈激就愈反叛。」
六時許，卓林甫出閘即匿在同學背後避鏡頭，期間連媽咪叫亦聽不見，Elaine更一度嘗試牽卓林手。問卓林有否嬲媽咪？她邊行邊答：「冇。（買禮物畀媽咪？）有。（掛住媽咪？）Yes！（之後向媽咪打開心窗？）Yes！It's a start！」兩人返到大埔寓所時，被問到會否再「離家出走」？卓林未有回應便匆匆入屋。問到會否擔心女兒再走？Elaine笑道：「大吉利是過你！應該唔會。」
