吳若希速袋百萬 搵定筍盤
歌手吳若希（Jinny）、泳兒及陳庭欣等昨日於電視城為慈善節目進行拜神儀式。壽星女Jinny自爆於一周內勁賺七位數廣告酬勞當禮物！而笑言正儲錢買樓的她渴望拍拖，實行要「有仔又有樓」！
吳若希、泳兒及陳庭欣於昨日在電視城為慈善節目進行拜神儀式。適逢Jinny廿三歲牛一，好友許廷鏗為她送蛋糕慶生。抱恙現身的Jinny直言生日會於工作中度過，日前更獲吳業坤及胡鴻鈞等開派對慶祝。她自爆一星期內接下三個廣告，勁賺七位數當作禮物：「算係客戶送禮物畀我。（密密賺錢？）近七位數！公司日日幫我慶祝，蛋糕都食咗六、七個！」
問到她會否買禮物獎勵自己？Jinny笑言想買樓，又明言想盡快覓得「筍盤」：「儲緊錢，終極目標係買樓，希望今年搵啱樓盤！（搵埋異性筍盤？）希望搵到個伴！」問到媽媽有否封利是給她？Jinny搞笑讚媽媽「精叻」：「佢會扮唔記得！（生日願望？）大家都身體健康！」
泳兒想北上掘金
提到於內地人氣高企的陳偉霆為母親豪擲二千七百萬買樓，問Jinny會否渴望到內地發展？她說：「我留喺香港舒服啲，又唔捨得媽咪。」同場泳兒直言希望北上掘金，倣效對方買樓送父母：「梗係好啦！想買樓畀佢哋，等佢哋可以舒服咁退休。」以緊身黑色背心上陣的泳兒表示將於直播節目上除鞋跳舞，更自爆曾穿上高跟鞋於後樓梯仆到趴地。
至於陳庭欣透露將為無綫新劇《公公出宮》到開平拍攝一個月，首次出外景拍攝的她笑言準備過程似足搬屋。
文：影視組