發哥買嘢唔使折 香香跟風直情攞

華姐出身的岑麗香（香香）雖然自小在加拿大長大，不過她也相當留意巨星發哥的事！有機會向發哥發問，香香興奮謂：「我鍾意你成日搭地鐵（港鐵），又走去街市買餸，呢啲係真人做嘅嘢，多謝你！」

發哥：「真人做嘅嘢？（台山話）呀香香，你就加拿大返嚟，嗰邊台山人多，我覺得你都似係台山人，我唔知你係台山、開平定燕平吖，我拍《秋天的童話》去紐約嗰時都有好多台山人，所以我對台山啲妹頭有感情，我見到你珠圓玉潤，都似係台山嗰隻。」

放大圖片	香香睇完發哥自稱「折都唔攞」的回應後，即搞笑稱「學到嘢」。

香香：「你平時去街市鍾意買餸，人哋會唔會畀折頭你？唔畀你又會唔會講價？」

發哥：「使咩攞折頭？直情攞啦！我開o架！成個九龍城都係我開！佢哋唔敢問我攞錢嘅，我當自己屋企，當自己開舖頭，折都唔攞，佢哋會話隨便攞，唔使錢！我係土霸嚟！」

搭港鐵撞巨星秘技

香香：「我想問你成日搭地鐵（港鐵），我去邊個站先可以撞到你呢？」

發哥：「有人問過！我過海就屋企行過去太子先，如果我去大嶼山行山，就梗係坐東涌線，如果九龍塘轉車，香港線係多人，我就會坐觀塘線，喺鰂魚涌嗰邊過海，所以你要撞我，其實幾萬分之一（機會），好難好難，你又唔知我幾時去！講開又講，你同麥包個節目我有睇，你煮啲甜品，好鬼好食！（台山話）幾時煮過我吃話？香香！」

香香：「我唔係台山人，但我來自加拿大，有好多山，我帶你去行山！仲有，香香會隨時煮甜品畀你同你太太食！我今日仲學咗一樣嘢，我會去街市直情攞，我唔會問人拎折頭，我直情攞呀！跟住我會去你屋企，煮甜品畀你哋食！」

文：陳偉立　

採：陳永峯、林希孺　

攝：秦健輝、唐豁莊、鄭家俊