區瑞強教路 戴帽保青春
經常「見帽如見人」的區瑞強自爆「戴帽之謎」，笑言自己其實有頭髮，戴帽只是「長壽秘方」之一！他更親自傳授六十年來各種「Keep Young」秘訣，形容人生就似衣櫃一樣，太過執着事情的去留，只會令「衣櫃」變得七國咁亂。
「民歌宗師」區瑞強（Albert）即將於月尾舉行演唱會，Albert雖將「登六」，但仍然時常保持心境開朗，適逢演唱會Albert就大派「Keep Young」錦囊！Albert講第一樣要注意身體健康，當然離不開做運動，他直言高爾夫球是自己最享受的運動：「Golf一個字就包含咗Great、Oxygen（氧）、Leisure（悠閒）、Fun（樂趣）四大元素。而呢四個元素就係生命力來源，無論對身、心都健康，我平均一星期都會打一至兩次。」
貪方便唔Set頭
而經常帽不離身的Albert又笑言戴帽亦是保持青春的方法之一：「大家成日話我戴帽係咪冇頭髮，其實我係有o架！不過日日戴帽係因為方便，唔使Set頭。」Albert更自爆家中的衣帽間，只有「帽」而沒有「衣」，單單是帽已經有幾百頂：「初初係貪方便所以先戴戴，因為戴咗帽就唔使Set頭，戴戴吓就變咗一個儲物嗜好。」
買衫細一個碼
Albert又教路要保持青春亦可以從衣着上入手，不過並不是要潮爆時裝，而是買細一個碼：「平時買衫要買細一個碼，當你成屋都細一個碼時，你就唔會捨得肥到着唔落。」他更以衣櫃比喻生活，每次「執衣櫃」時不太過執着：「人生就好似執衣櫃，換季嘅時候唔好咁計較，決定丟唔丟時要放得開，買得起放得開！人生亦都一樣，學習唔好為啲瑣碎事而糾纏。」
文：音樂組
攝：劉智源
場地：小白鷺