聰伯：你睇過我胴體 發哥：封你做偶像

歌手張繼聰自被發掘演藝細胞後拍戲拍唔停，他更自稱是發哥影迷，知道有機會向發哥發問而興奮說起：「我之前喺電視台拍劇會問台前幕後打探吓發哥當年喺電視台拍劇嘅神髓同往事，得到嘅係一致讚賞，我好鍾意佢可以令個拍攝氣氛好開心，每個人喺開心冇壓力嘅情形下發揮，呢種先係最一級嘅演員！曾經『船頭尺』（《秋天的童話》中發哥的角色）有句對白成為咗我嘅座右銘，就係『自己Happy咪得，使乜理人？』」

發哥：「自己Happy，側邊啲人好辛苦，一定要令人哋Happy，自己先Happy！喂！唔好講咁多，你眼鏡咩事，花得咁淒涼！依家有鏡片防UVo架嘛！我睇唔到你眼睛，眼花花喎！你咁後生，搞到自己咁樣，好似阿伯咁，阿聰伯，你搞咩呀？好！你鍾意『船頭尺』你咪『船頭尺』囉！謝安琪咪鍾楚紅囉！仲有，你喺TVB成日撈我啲底呀？我好多Friend喺入面，你唔好咁多嘢講呀！有咩我叫佢哋郁你！」

張繼聰：「依家會唔會仲遇到唔開心事？如果遇到嘅話會點樣處理同面對？」

發哥：「我哋成日話，人生不如意十常八九，剩番一，你嗰一都唔開心？老虎都要開心，你吸到一啖氣都喺度，又唔使錢嘅，活得開心快樂就係每一啖空氣，有咩唔開心呢？唔會！」

獲神級回覆好感動

張繼聰：「拍戲收到角色時會做啲咩事前準備工夫？」

發哥：「呢個就簡單，我其實好仰慕你，成日見你晒朱古力，啲朱古力又唔溶！舊舊都咁實，呢啲已經做晒工夫啦！我睇你好多戲！我封你做偶像！張繼聰，畀啲心機，做你唔死算你夠運，你套套都有，你紅得好緊要！恭喜你！慢慢捱，有排你捱！」

得到發哥的神級回覆，張繼聰直言相當「滾動」（感動）：「好似同發哥對話咁！發哥好似望住我咁啦，同埋佢知我太太叫謝安琪啦，同埋見過我嘅胴體啦，又睇過我嘅演出啦！望住發哥，嗰種觸電嘅感覺係第一次，我都希望有一日隔住個Mon咁樣電人，嗰個人都可以被電暈咗！」

張繼聰向「慈善家」致敬

今時今日發哥身家數以億元計，佢一早已決定身後會盡捐身家做善事，至於捐去邊，佢就會喺當時睇社會有乜需要再決定。不過大家唔使擔心，發哥咁好心又咁有善心，一定長命百歲啦！