許廷鏗 吳若希親熱冇take two
「星夢」一哥許廷鏗日前請來「女神」吳若希擔任新歌《仁至義盡》MV女主角，穿上吊帶衫熱褲的吳若希與許廷鏗在浴缸纏綿及「咀嘴」，雖然兩人首次合作，但相當有默契，就連「床戲」都一take搞掂。
許廷鏗（Alfred）與吳若希（Jinny）在新歌MV中飾演情侶，由於歌曲講一對情侶對感情可以去到有幾盡，故拍攝時兩人有不少親密鏡頭，如浴缸纏綿、床戲，甚至為挽留男方使出「咀功」，雖然Alfred與Jinny相識多年，但首次合作拍MV兼演情侶，不過兩人默契十足，做足功課的兩人一埋位即「入戲」，全部一take搞掂，難怪導演邊拍邊大讚good。穿熱褲騷42吋長腿的Jinny相當煞食，問到Alfred是否因為Jinny有長腿才找她做女主角？他否認說：「大家識咗好幾年，知佢能力唔係大家觀眾見到咁少，佢對自己事業、演戲投入度好大。」
胡鴻鈞變外賣仔
首次在銀幕「獻吻」的兩人被問到有否感尷尬？Alfred說：「初時係唔知點，當播音樂就入咗局。」擁有不少親吻戲經驗的Jinny說：「少不免會有啲尷尬，好彩首歌帶到我投入。」問到會否咀出火？Alfred笑指兩人是兄弟情，抵死的Jinny說：「點解唔可以姊妹？」Alfred反駁說：「我覺得你man過我。」
問到兩人對感情是否去得很盡？Alfred坦言雖然較理智，但只要搵到一個合適伴侶會奮不顧身投入，他說：「如果有呢個人出現，無論男女都好，都會奮不顧身撞落去，就算知道有幾錯、幾唔啱都會去做。」專一的Jinny表示只要選定男友會全程投入，她說：「當然有啲嘢唔試過係唔會知道，盡力去試同改變，唔得都同自己講已經仁至義盡，如果大家真係行唔到落去都會放手。」另外，胡鴻鈞則變身「外賣仔」帶着兩大袋美食來探班。
阿叻冇搵彭懷安
此外，Alfred、Jinny昨日與陳百祥（阿叻）等出席無綫活動，擔任主持的阿叻直言做善事有好報，事後通常會股票有斬獲。對於舊公司藝人Eddie（彭懷安）被《好報》拍到背未婚妻朱慧敏夜會長髮女，阿叻表示未有聯絡Eddie：「呢啲嘢冇得教，要一個人處理。（點可以專一啲？）可能我同佢一樣呢？我好彩冇畀人影到啫！哈哈！講吓咋！我梗係好穩陣係冇先咁講啦！其實最緊要另一半信任啫！」
文：音樂組