軒仔讚笑騎騎發哥：後面放毒蛇
第2集《我愛發哥》昨日在《東網巨星》App內播出，網友至愛男歌手張敬軒與影帝周潤發隔空過招，發哥搞笑自爆被軒仔的血漿造型嚇破膽！他又教軒仔要保持樂觀心境，令身體更好，五臟六腑都會騎騎笑！
歌手張敬軒跟很多影迷一樣，喜歡在不同世界的發哥，他大讚：「發哥喺電影入面嘅瀟灑，生活中嘅親和力，私底下同發哥相處最鍾意佢嘅智慧，發哥係好intelligent嘅男士，同埋佢博學，除咗識好多文學作品、睇好多書之外，佢都幾八卦，佢每日都會掃晒全部報紙嘅時事版、經濟版、港聞版、娛樂版，有好多我啲八卦娛樂新聞佢都知，每次喺髮型屋見到都會問我近期新聞。」
發哥：「講開又講，你嗰次做咩整到成頭都係血呢？嚇得我以為你畀人扑親個頭，我舊時喺ＴＶＢ有一次都係成身血，點解我唔洗呢？因為我冇覺好瞓，返去搵張廁紙捲起就瞓覺，因為我跟住就要開早班，恰得個幾鐘！我就話啫！你唱歌嘅做咩都搞成咁？做咩唔搵嘢止血呢？仲要包晒頭，現場又冇人叫999，原來佢係去唱歌，嚇得我吖！」
正能量感染力強
軒仔得悉發哥回應後，即笑言：「搵食艱難呀發哥！」之後，軒仔又忍不住問：「點解可以成日都Keep到咁開心？我每次喺髮型屋見到你都係笑騎騎，點解呢？」
發哥：「我喺後面放毒蛇你唔知啫！做人開心，你畀緊正能量人哋嘅，就算人哋唔開心，見到佢個樣都開心，感染力好緊要o架！開心係令身體好啲，每一個五臟六腑都會騎騎騎咁笑，都唔會有咁多病毒o架！你有咩咁愁啫！你有車有樓又靚仔，又有靚髮型師。」
得到發哥的神級回覆，軒仔當堂醒神晒！他說：「多謝發哥教路！你睇發哥塊面，嘩！青靚白淨，仲係花o靚一樣！你保養得咁好，男人食咩補身好呀？我想問發嫂煲咩畀你，食得你咁青靚白淨o架呢？」
文：陳偉立
採：林惠珊、曹家誠
攝：秦健輝、司徒國榮、鄭家俊