星Sing頌煇煌
煇哥為香港樂壇編寫經典樂章，同時歌曲亦創造出樂壇的粒粒巨星，在他們的歌藝事業寫下輝煌一頁，一眾參與煇哥榮休演唱會的歌手，向煇哥送上最衷心的致敬。
汪明荃
煇哥當然可封為樂壇教父，佢為每個歌手創作獨特嘅歌曲，令每位歌手企出嚟有自己獨特嘅風格。煇哥嘅作品超過1200首歌，屬於多產而質同量都係好驕人。每個人始終會離開佢崗位，尤其煇哥搵到佢畫畫嘅興趣，到呢個年紀佢鍾意做乜嘢都冇所謂，希望佢身體健康，生活愉快，享兒孫福。
陳潔靈
我好幸運，煇哥一首《今晚夜》陪我走過幾十年，煇哥係我幸運星，我哋12個亦係煇哥幸運星，難得走埋一齊唔係偶然，大家都好享受每一晚。煇哥畀我最大感覺係大家喺藝術洪流內不停前進，係個好偉大嘅音樂家，推動香港音樂文化。
仙杜拉
知道自己喺煇哥榮休演唱會名單入面之後，即刻由加拿大飛返嚟，有份演出係榮幸同驕傲，煇哥寫咗好多好歌畀我，係家傳戶曉，尤其一首《啼笑因緣》帶我踏入廣東歌之門，每次上台唔唱呢首歌，觀眾都唔畀落台，所以有責任返嚟向煇哥報恩。
關菊英
開心能參與煇哥榮休演唱會，好感激煇哥寫咁多好歌畀我，今次係40人樂隊，用新嘅音樂去演奏，畀觀眾好澎湃同震撼感，令樂迷有難忘嘅音樂享受。
羅嘉良
能夠參與煇哥榮休演唱會係太榮幸，我細個聽煇哥嘅歌嚟撈飯，諗都冇諗有日唱到煇哥作品，更加冇諗過參與到煇哥榮休演唱會同秋官、阿姐同台。煇哥多謝你，希望你身體健康，快快樂樂，長壽長壽再長壽！
葉振棠
由第一次「煇黃」演唱會已經參與煇哥嘅演出，本來每隔幾年就有一個咁嘅聚會，但依家煇哥話榮休，內心係失落。今次亦感受到主辦單位對煇哥嘅重視，用40人樂隊真係冇得頂，煇哥幫我寫嘅作品大概10首，而《忘盡心中情》同《戲班小子》去到邊到都要唱。
區瑞強
好榮幸煇哥幫我作嘅兩首歌《相識在童年》及《那天再重聚》，有次喺加大拿開騷，煇哥由頭撐到尾，雖然自己即將開騷，都要堅持唱煇哥嘅榮休演唱會，同葉振棠唱《難為正邪定分界》，好新鮮兼特別，煇哥嘅作品永遠不老。
葉麗儀
近年專心喺澳洲湊孫，但知道煇哥榮休就一定要返嚟，冇煇哥就冇葉麗儀，我個仔都支持我今次返嚟唱，如果唔唱怕將來遺憾。喺後台同六位女藝人相處好開心，仲同關菊英、汪明荃台上一齊晒「事業線」。
張德蘭
知道煇哥榮休消息，內心好矛盾，一方面唔捨得，但另一方面佢可以享受人生係件開心事，希望煇哥畫畫之餘，有機會做到煇哥嘅Model，幫我畫一幅畫就好嘞！