Kay越級挑戰 為煇哥奮鬥
經典金曲跨越半世紀的樂壇教父顧嘉煇，於紅館舉行一連十二場的《顧嘉煇榮休盛典演唱會》，前晚踏入第五場，12位樂壇巨星施展渾身解數獻唱煇哥的經典金曲，眾星對能參與今次煇哥的榮休之作深感榮幸，亦對煇哥表達尊敬及支持。當中謝安琪（Kay)選唱《奮鬥》向前輩「超級巨肺」甄妮挑戰，而鄭少秋（秋官）更封煇哥為「樂壇巨人」。
12位天王天后級歌手為能踏上煇哥的榮休舞台感驕傲，為答謝煇哥寫下不少名曲，每晚都以最佳狀態兼靚聲來致敬。獲煇哥欽點演唱《奮鬥》的Kay表示：「我同煇哥都想揀一首激勵人嘅歌，而《奮鬥》入面一句，寧願奮鬥到百千次，創出幸福快樂鄉，呢個都係好多香港人嘅心聲，自己都好有共鳴為家人事業奮鬥。」但Kay坦言這歌難度很高：「首歌係甄妮姐姐以佢巨肺嘅唱腔去唱，喺唱腔上面，我都揣摩咗好幾種，最後揀咗種比較實力派又好有中氣去唱，覺得澎湃嘅感覺係好適合，出嚟效果大家都鍾意。」對於參與煇哥榮休演唱會，Kay坦言：「好榮幸，多謝煇哥同我結下呢個緣分，煇哥承認喺佢退休之前為我寫首歌，係意外收穫。」
盛讚音樂巨人
至於造型百變的秋官變身「印度王子Look」出場，盡顯王者風範，秋官稱讚煇哥的音樂成就：「煇哥係音樂界嘅偉人、巨人，雖然佢個子比我細、比我矮，但音樂造詣係巨人，能參加煇哥榮休演出係我嘅榮幸，呢啲咁大製作，咁大樂隊係好難得，自己都飄飄然。」
欽佩可愛教主
樂壇年資較輕的張敬軒，感謝煇哥給與演出機會：「相信係我同煇哥都係同鄉廣州人，呢個機會係爭崩頭，當時知道只得兩個位，最後就揀咗我同Kay。」軒仔稱煇哥除音樂值得敬佩，其「童真」亦值得欣賞：「煇哥有小朋友一面，好搞笑，好得意，覺得做呢行唔能夠唔保持童真，冇鍾意玩嘅心態做唔到落去，睇吓煇哥同譚詠麟都係嘻嘻哈哈，但煇哥屬於乖啲嘅小朋友，我覺得煇哥唔單止係樂壇教主，仲係『可愛教主』。」
文：音樂組