張赫任達華托車變巴打
藝人任達華在韓國成為「萬人迷」，連韓國型男張赫也是他的粉絲，張赫更為了跟華哥合作而更改檔期。近日兩人為新片開工，華哥大讚張赫順得人，感激對方教自己韓語「冧女」。而二人更冒風雨拍攝一場飛車墮橋戲，可謂患難見真情！
自從任達華年前與韓星金秀賢、全智賢合作拍攝電影《盜賊門》，創下韓國電影票房紀錄後，華哥在當地知名度飆升，不時應邀到韓國出席活動，並與粉絲會面。近日有內地片商投資開拍一套福爾摩斯式懸疑電影《真相禁區》（暫名），邀請韓國型男張赫演出，起初他因檔期問題計劃辭演，但當得知劇組安排他與華哥鬥戲，張赫即時更改行程玉成其事，又將上月才出世的小女兒交由太太獨自照料，隻身趕往台灣拍外景，可見華哥魅力非凡！
拍飛車墮橋戲
華哥和張赫近日已相繼飛抵台北，會合台灣演員霍建華等開工，華哥預算要在當地逗留一個月。原本昨早拍攝一場飛車墮橋戲，卻受到天雨影響，但由於拍攝時間緊迫，台前幕後一見雨勢減弱，下午即爭取時間開工，當工作人員用威吔將汽車吊高擺位，童心未泯的華哥及張赫即化身超人用手「托」起汽車拍照留念，令在場人士忍俊不禁。
每日一句韓文
談起這位粉絲拍檔，華哥接受長途電話訪問說：「佢人好好，雖然大家語言不通，但都好投契。我就爭取機會學韓文，叫佢每日教我講一句，今日佢就教我讚啲女仔靚嘞。（周圍讚人？）係呀，美言唔嫌多嘛。（帶張赫周圍去食嘢？）冇乜時間，我夜晚嗰餐又一定要食水果麥皮健康餐，大家食得最多咪片場嘅午餐飯盒囉。（聽聞佢因為你而接呢套戲喎。）唔好咁講，大家交流吓啫。」
文：影視組