何傲兒哨賣靚貨 遭Ali姣搶客仔

李佳芯及何傲兒日前到馬鞍山郊區拍新劇《波士早晨》一場童話式幻想戲份，交代傲兒與Ali本是兩姊妹，卻因外表不同而令待遇大不同。

佳芯男仔頭

劇情講「哨牙醜女」傲兒賣靚生果，即使減價都冇人吼，相反獲無綫捧為「新一代狐狸精」的Ali大玩Cosplay，化身嬌俏白雪公主，大放生電迷倒眾男，賣100蚊一個爛生果依然有仔肯買。

演慣小三的Ali拍攝時全力瞇眼甜笑放電，電到幾位男演員暈大浪，之後又率領裙下臣跳舞。被冷落的村姑傲兒又喊又嬲，更哨住牙仰天長嘯：「點解上天咁唔公平？」喜劇感十足！

醜傲兒與靚佳芯一起賣生果，眾客仔只幫襯佳芯。	何傲兒	李佳芯放生電引誘男士買生果。

拍攝後Ali接受訪問，說現實中不會放電，但自認男仔頭，更笑言Cosplay白雪公主感覺似反串：「我鍾意扮啲好Man嘅造型，就算做『綠巨人』都得，一向唔恨做公主，依家感覺似反串。」問曾否像角色一樣恃靚攞着數？Ali稱：「冇，我唔覺得自己靚，細個仲幾醜添！」

傲兒唔好勝

現實中是靚女的傲兒贊成樣靚有着數，平日購物都獲減價及有贈品，問會否跟胞姐何傲芝鬥靚？她笑說：「唔會，我冇咩好勝心，家姐好有潮流觸覺，佢襯完衫我就照抄。」

文、攝：影視組