范振鋒搵屋斥Bob開價高
藝人范振鋒與太太李思欣、黃榕、仙樂都等昨日出席活動，早前與人打架的阿范說：「傷好番，內心未好番，雙方律師傾向和解。（之前話搬？）睇咗好多樓，但風水師話唔好。（Bob話幫你？）佢有十幾個單位，話睇啱就賣畀我，我發現佢開價貴成截，離晒譜，明幫暗整蠱！佢仲話：『風水屋嘛！』我同佢講：『咁你生三個都係女嘅？』咁生三個都好叻！」
林盛斌（Bob）昨日回應表示冇嬲：「佢講笑啫，冇所謂，自己友，佢唔想生女，我想生女呀！之前佢睇啱嗰啲單位，已經租出，我介紹咗啲地產朋友畀佢識，睇吓幫唔幫到佢。」
至於低胸出席的黃榕近日忙於影寫真集，自爆影相時被男攝影師指她挑逗他：「影相都要畀戲！佢叫我擘大對腳，仲話：『你未影過性感相咩？影咁多年都係咁！』我已經擘到好大，好尷尬！」不懂游水的她會搏盡全裸水底寫真，因至今仍有32C、23、33身形，值得驕傲！
