林保怡見證時代 滔滔不絕

１：力求完美拒認叻

保怡向來自我要求極高，除了擁有處女座的性格外，當年跟過事事追求完美的葉德嫻，令他養成律己以嚴的性格。

「記得好耐以前做唱片公司助理，當時試過幫葉德嫻手，好記得佢同我講一定要做好啲，唔好以為錯少少就冇嘢，到隻唱片出嚟發現冇得再改就麻煩，所以我哋對歌詞、邊個作曲、填詞都對得好仔細，但訓練到我依家嘅性格，唔好做錯。好多人叫我開公司做製片，我驚自己control唔到啲嘢會發癲，因為我係處女座，事事要求完美，都係做番演員好過。

林保怡直言與劉青雲（左）在《大時代》鬥「丁蟹」好過癮，力求完美的他希望可再演「陳滔滔」一角。	《壹號皇庭》系列	《鑑證實錄》系列

「我嘅座右銘係每日都開心，人生苦短幾十年光景，好彩我有運氣做呢行，生活都OK，初時無心插柳試吓拍戲，我之後好認真對待呢份工作，唔覺得自己係明星，永不炫耀自己嘅工作。」

《妙手仁心》系列	《金枝慾孽》	《天與地》

２：撐郭藹明做影后

《大時代》有兩個人令保怡感受最深，一位江毅叔，另一位是劉青雲，談到青雲的賢內助郭藹明，保怡笑言那麼快嫁給青雲是一種浪費。

林保怡不認為自己是明星，指演戲一定要用心和靠實力。	林保怡與King Sir（左）合作演舞台劇《李察三世》，令他得到寶貴的經驗。	在娛樂圈浸淫多年的林保怡表示電視節目缺乏競爭，令他慨嘆電視圈「集體水土不服」。

「《大時代》個個都咁好戲，當中有兩個人令我印象特別深刻。第一個就係江毅叔。當時我第二年入無綫，仲係一個好新嘅演員，有人同我講江毅叔好惡，對對手好有要求，唯有背足對白一字不漏，好彩成功過關，江毅叔一句都冇鬧過我。

「講《大時代》，點可以唔講劉青雲，我同佢嘅戲係最多，但拍呢套劇時大家都唔去到最熟，當時佢同啲女仔如藍潔瑛、郭藹明friend，我要之後幾年，先慢慢做朋友。記得拍《大時代》有場戲我要拍到第二朝，青雲同我捱到五、六點時，當時雖然唔係咁熟，但佢臨走前都問我食唔食早餐，可以睇到佢為人真係好好。

「有樣嘢真係要講，就係郭藹明咁快嫁畀青雲係好浪費！喺拍《大時代》時，我已發現郭藹明係一個純用直覺去演戲嘅天才型演員，我之後同佢喺另一套劇《奇情小男人》有更多對手戲，發現佢嘅演技係與生俱來，如果唔係咁早嫁畀青雲，佢可能已經攞影后。

「依家我深夜一定會追睇番《大時代》，因為好多細節都唔記得，就係有種魔力令你溫故知新。有人問我點解《大時代》重播都咁收得，依家仲拍唔拍得番同樣水準嘅劇？我相信真係要有老闆肯花錢group番台前幕後精英，一個不漏再拍至得，如果真係開電影版，要我做番『陳滔滔』，要我半年淨係為《大時代》開工我都願。

「講真如果冇無綫，今日林保怡就冇咁多粉絲去認同，因為佢哋仲係講緊《鑑證實錄》、《妙手仁心》、《壹號皇庭》、《天與地》，呢啲劇全部都係無綫劇，無綫係我出身嘅地方，佢哋搵我真係OK。如果可以允許一啲獨立嘅製作公司去拍一啲有水準嘅劇，拍咗之後賣番畀電視台，受益會係香港觀眾，係好好嘅良性競爭。」

３：想回娘家過戲癮

保怡如今已離開無綫兩年多，雖然在外闖蕩搵得多，但熱愛演戲的他仍想返娘家拍劇，面對香港電視圈正在轉型，縱橫這個圈子多年，保怡一針見血道出這個「大時代」的轉變。

「我喺無綫最後一套劇係《天與地》，好開心離開無綫前最後一套係呢套劇，之後就係我闖蕩江湖嘅時候，我覺得要用仲有嘅青春博一博，如果你唔去把握就永遠都唔會有機會。

「要尋找好嘅劇本同角色，好嘅意思係我可以駕馭得到嘅角色，平時微博好多人同我講睇番我做嘅無綫劇，如《讀心神探》，甚至《金枝慾孽》，希望可以做番孫白颺（《金枝》角色），係我第一次演古裝角色，可以攞到個感覺，而令觀眾睇得好舒服，所以我覺得劇本同角色係我第一個選擇，都好想返無綫過戲癮！

「電視業如一間餐廳好生意同唔好生意，係有原因，由食物素材到廚師，再到service，都好影響到生意，唔知點解食乾炒牛河一定係廣州好食過香港，點解呢？所以香港電視台嘅節目，唔係一日半日解決到好唔好睇嘅問題，可能係集體水土不服。」

４：用心演戲唔為錢

內地搵人民幣當然賺得多，但保怡並非下下都為錢，因為錢係搵唔晒，最緊要是對得住自己的心。

「了解我嘅朋友都知我唔會太過向錢看，記得當時未離開無綫，同時間有兩樣嘢搵我，一樣係樂易玲幫我接咗套大陸劇，同時King Sir（鍾景輝）嘅舞台劇《李察三世》又搵我，我衡量過決定唔要大陸拍劇舊錢，我要試一試未試過嘅舞台劇，如果真係好計較錢的話，根本冇可能接套舞台劇，因為大陸舊錢係大好多好多，但我覺得喺我演藝生命入面要多嘗試，仲要同King Sir一齊演，真係好想跟住佢學習舞台劇，一做就做咗11場，每次完場出嚟接受掌聲，係做電視同電影畀唔到嘅喜悅。如果呢幾年真係要爛拍的話，我可以搵好多，但可能會有人話：『林保怡乜你拍埋啲咁嘅劇！』咁我就輸晒！

「我知大陸拍劇啲電視台出手好闊綽，隨時會擺架跑車喺你面前叫你揸走，但我覺得拍戲唔係咁樣，要自己賺嘅錢買番嚟先開心，除咗粉絲送啲小禮物畀我，一切要靠自己爭取，尤其我呢啲唔係太靚仔，一定要靠實力，話畀人聽你係用心演每個角色，嗰時同戚其義合作，拍《珠光寶氣》直情開心到癲！」

後記：以父母名義行善

保怡愈來愈懂得享受生活，呷杯凍檸茶，笑看風雲滔滔不絕。去年林父離開人世，身為兒子在哀痛過後重拾心情，明白幸福不是必然：「我好接受生老病死，爸爸年紀真係大，要走都冇辦法，傷心過後要重組自己生活，嚟緊我會用番我爸爸媽媽個名助養兒童，雖然唔多，但希望再助養多四個！」施比受更有福，原來，保怡早已知道。

口述：林保怡

筆錄：專案組

攝影：秦健輝