鍾嘉欣 方力申錫得尷尬

汪明荃（阿姐）、鍾嘉欣、方力申、岑麗香（香香）、黃心穎等，昨日為無綫劇集《華麗轉身》宣傳，嘉欣與方力申在海濱白教堂預演婚禮。披十萬元婚紗上陣的嘉欣，乘坐馬車由阿姐陪伴出嫁，一對「新人」在台上隔住膠片玩錫錫時，被司儀取笑現實中有另一半而顯得尷尬。嘉欣表示：「未試過宣傳又有馬車，又有教堂。抽離咗角色後再要親熱係有啲尷尬。對於夢想婚禮，自己鍾意冬天，想喺室外雪地結婚，要有教堂。（幾時結？）冇諗，順其自然。」

阿姐否認洗腦

當被問到與伍允龍的戀情一時被傳分手，一時又傳情不變，嘉欣對此不願置評：「私人嘢唔回應。」

一眾演員到愉景灣海濱白教堂宣傳新劇。

姊妹團陣容包括岑麗香（左起）、王君馨、黃心穎、陳明恩、李璧琦。

而阿姐對於主唱的主題歌《華麗轉身》被指是「洗腦歌」，她笑言：「唔係洗腦，劇集谷宣傳啫，係要用到盡。多謝佢哋，但係會繼續聽到o架。希望大家留意我嘅演繹，歌詞好有意思。」提到有指鄭少秋指阿姐在《Sunday靚聲王》中唱歌咪嘴，阿姐表示：「我點會咪嘴，同埋秋官一向都好慎言。」

香香樂陪姊妹

而穿伴娘裙亮相的香香，笑言仍未想到夢想婚禮如何安排，一切順其自然。被問到有傳鍾嘉欣甩拖，可有找她傾訴？香香說：「呢啲係私人嘢，如果好姊妹想傾訴，我當然願意去聆聽。」

文：影視組