周麗淇「髮」圍 被嘲蠢材變總裁
藝人周麗淇（Niki）昨日以總裁身份出席其髮廊分店開幕活動，好友謝天華亦到場支持，Niki揚言會贊助他一輩子免費護髮。天華即大讚「老闆」Niki叻女，更笑言她由「蠢材」變成「總裁」。Niki透露早於五年前已投資此髮廊，並投資了七位數。問男友徐正曦曾否到髮廊護髮？她說：「有，佢依家唔喺香港，所以嚟唔到。（忙到冇時間陪男友？）女人要有自己事業，唔可以靠晒男友，要有番自己嘅價值好啲。」
另外，Niki胞姐、懷胎7個多月的名模周汶錡（Kathy）昨午為其自家的美容公司親自擔任廣告的形象指導，自爆重了13、14磅的Kathy，坦言屆時會開刀產子：「依家好驚，有時會諗到開刀嗰刻、推入手術室嗰刻，搞到唔着。」問到老公會否陪產？Kathy笑言：「佢問我剪唔剪臍帶添，我話『你都係唔好剪，你唔專業』，驚到時候興奮得滯，手震剪得唔靚，肚臍好緊要。」對於BB的名字，Kathy表示中文名交給師傅改，英文名由老公改，而乳名就視乎BB出世似乜改乜。
