黎明寸張家輝 談情笑死人
為新戲操Fit了的黎明，昨日出席馬場活動時透露在新戲中不需爆肌演出，問若果要他操到如張家輝之前的鋼條身形可會考慮？他直言這樣做自己會被人笑，並寸若張家輝拍愛情片如《甜蜜蜜》亦一樣會「笑死人」。
黎明（Leon）昨日以大使身份在沙田馬場出席《愛彼女皇盃》賽馬日活動，問Leon平日喜不喜歡看賽馬？他說：「係時間唔得，等退休先。（會唔會做馬主？）我退休會騎添。（鍾意策騎？）拍戲騎同自己騎唔同嘅，拍戲騎有心理壓力，驚跌親唔能夠完成工作。」
「過龍會減到死咗」
當記者指Leon身形fit了，他說：「都係咁，飛嚟飛去，今晚要去台灣拍戲。（有冇繼續食減肥餐單？）要停o架喇，仲得了，黐線o架咩，呢啲一星期後會習慣，食啲健康餐單，早上可以食麵，晚上就唔食澱粉質。」當提到很多人都跟不到他的餐單，Leon即大爆金句說：「通常係冇自信嘅人先做唔到，人係咁得意，上帝製造人類，製造機會，如果個個都跟我呢招，咪冇人發明新方式，冇新發明。自信過龍就會減到死咗。（有冇做運動？）運動要減完先可以做，有兩種，一係由day 1開始日日跑30km，一係就先瘦咗再做運動，唔係就會變阿諾舒華辛力加，我依家做簡單運動。」
問新戲要否爆肌？他說：「唔會喇，我依家唔係拍拳手。（如果要你操到好似張家輝咁樣呢？）首先要諗吓會唔會畀人笑，自己要量力而為，我又唔係要學到張家輝咁，調番轉叫張家輝拍《甜蜜蜜》吖，笑死人。如果叫張家輝做《拳霸》都會畀人笑，轉體三周半踢爆交通燈，做出嚟都畀人笑。如果劇本唔會令我畀人笑我就會接，如果連自己睇完都會笑就唔會接。」
JW離巢闖天下
提到公司動向，Leon自言公司是中轉站式經理人公司：「我哋唔係超級大公司，冇幾千萬同人續約，當佢哋喺出面得到嘅價值可以提高係好事，有毛有翅（翼）自由飛走。如果有3億簽個藝人，都唔會咁做，3億可以做好多嘢。公司會有新人出現，但唔會做同一個品種，觀眾睇到悶，公司唔會做死一種。」
曾是Leon公司旗下的歌手JW昨剛巧現身馬場，她表示在場內有遇見Leon，被問到Leon形容旗下藝人有毛有翼就飛走，JW說：「（公司及同事）佢哋就好似屋企人咁教我好多嘢，我當時做新人第一年出道就拎咗金曲金獎，覺得好榮幸。大家合作係experiment（試驗），只係試完發現work out唔到。同舊公司完咗約，我想趁後生出去闖吓，好開心有人approach我。」
文：名人組