鄭希怡：佢出世想靜吓
本月８日誕下女兒「梁浸浸」的藝人鄭希怡（Yumiko），因Ｂ女呼吸系統出問題，於出世當晚即要送到東區醫院的兒科深切治療部留醫兩星期，到昨日Yumiko終在微博宣布梁浸浸可以出院回家，並先後上載ＢＢ車和女兒的近照，相中可見梁浸浸擁有分明的輪廓和深邃的雙眼皮。
每日提心吊膽
笑指女兒離家出走兩星期的Yumiko接受訪問時表示：「梁浸浸已經返咗屋企，我諗佢第時一定會係好獨立同埋好貪玩嘅小朋友，因為佢一出世已經想自己靜吓，出去住一排，跟住先肯返屋企。」直言女兒留院期間每日都提心吊膽，直到醫生向她表示﹕「醫生就話其實佢依家情況都開始穩定，你會唔會想帶佢返屋企？嗰刻好開心，亦都好多謝東區醫院嘅醫生、護士喺呢十幾日對佢好悉心嘅照顧，令到佢好番得咁快。」
遺傳父母靚樣
同時，Yumiko又感謝所有朋友、同事、傳媒和網民的鼓勵，她說：「我依家都要肩負起做父母嘅責任，學習點樣真真正正照顧佢，喺度同大家報一個平安，多謝對佢嘅關心。」而好姊妹蔡卓妍（阿Sa）和鍾欣潼（阿嬌）都稱稍後會探ＢＢ女，又分別大讚梁浸浸盡得爸媽的優良DNA遺傳，天生一副美人胚子。
文：音樂組