王敏德自薦搵Paco出碟圓夢

對Michael來說，近兩年可謂豐收又忙碌，做自家品牌、拍戲、出唱片、榮升老闆，樣樣都做得出色。Michael籌備多年，以自己的名字「MW MICHAEL WONG」命名的時裝品牌，2008年正式註冊，標榜「香港製造」，起初一直與不同的品牌crossover，因他的知名度，很快被人所熟悉，直至去年他才正式開店舖。

Michael因曾擔任不少品牌的代言人，激發起他創業的念頭，他說：「我成日諗，咁多年嚟不停為人哋嘅品牌做代言，點解唔自己推出一個，之後自己主動聯絡啲牌子做crossover產品，成績出嚟好好，令我對自己品牌更有信心，我嘅構思係想賣啲『true life』嘅用品，可以分四類，運動服、便服、型格服同埋晚裝，其實全部都係好多人平時會着嘅，好似早上着運動服打golf，中午變便服，晚上出席隆重嘅場合，要着晚裝，呢啲係活生生的生活態度。」而賢內助馬詩慧在時裝方面一向走在潮流尖端，被問到有否給予意見？他說：「有，佢會畀好多idea我，佢做咗咁多年模特兒，對時裝熟悉，我通常推出嘅服裝會第一時間畀佢着，佢再話我知邊啲地方要改進。」

王敏德拍MV出動兩個女兒曼喜（右）及麗嘉，背景更是私人飛機，十分架勢。	王敏德與名模馬詩慧一家五口樂也融融。	王敏德獲黃柏高（右）賞識，得圓出碟夢。

做老闆多嘢諗

由藝人演變成老闆，對Michael來說確實是一個挑戰，因所有事都需要自己親自去解決，他說：「做藝人拍戲只要做好自己嘅角色，讀熟劇本，好多嘢都有人follow，宣傳亦有好多人幫手，但做生意好唔同，有好多唔同嘅壓力，好似舖頭原定上年11月開，但因為裝修問題趕唔切而要延期；又因為我哋只得一間舖頭，所以做嘅貨唔多，唔同大公司會大量生產，所以搵製作都好多難度，啲廠都未必願意做，好彩都有好多公司支持同幫手，令到運作容易咗；仲有一個最大嘅壓力就係控制成本，啲錢唔可以亂用。（有冇諗住幾時回本？）冇咁快，最少要花兩、三年去慢慢經營。」

雖然還未賺到錢，店舖才開了約半年，但Michael已計劃打入大陸市場，今年暑假將會投資千萬在上海開店，他說：「單係香港一個店係唔夠，而且我選舖地點唔係啲人常去shopping嘅商場，反而揀車流、人流多，啲人容易望到我間舖頭，所以間舖位置主要係用嚟宣傳，大陸至係我哋主要市場，大家都睇好呢個市場，希望可以將香港品牌發揚光大。」

寫三首英文歌

Michael現雖然是生意人，但決不會放棄演藝事業，他謂現每年均會客串幾套電影，保持知名度，另一方面，他又再戰樂壇，年初推出了他期待已久的唱片。Michael熱愛唱歌，90年代時曾在泰國推出唱片，成績十分理想，之後亦不時有玩Band、與樂手朋友合唱、為演唱會擔任嘉賓、登台獻唱等等，可惜在樂壇的發展未如理想。而在一次機緣巧合下，他擔任演唱嘉賓，伯樂黃柏高（Paco）亦是座上客，大讚他唱功了得，他立即把握機會毛遂自薦，他說：「我有次幫太陽娛樂做表演嘉賓，Paco讚我唱得不錯，我即時同佢講我手上有三首歌，全部都係我寫，已經寫咗2、3年，但一直冇機會推出，問佢有冇興趣簽我，之後send demo畀佢，佢聽完話OK，之後就咁成咗事，推出英文唱片《Airways of Love》。」這三首歌出自Michael的手筆，可謂將他平時的生活態度表露無遺，MV中不乏飛機、遊艇、跑車、俊男美女，靚衫靚景，展現他奢華時尚的一面。

自家品牌仔女出馬

王敏德與名模馬詩慧結婚後，育有三名兒女，長女曼喜、麗嘉與孻仔躍穎，全都遺傳了父母的優良基因，擁有模特兒的高挑身材，極有潛質做明星，Michael當然不會放過這機會，自家品牌的宣傳照，除了親自出馬外，還找來三名子女一齊拍攝，出來效果媲美專業模特兒。

採訪：Jessica Lam

攝影：劉智源