高海寧攞正牌做電燈膽
久未有愛情滋潤的高海寧，已不停放聲氣叫身邊人做媒人，但女神一樣冇面畀，至今仍未有回音。她閒時只好相約好姊妹行街濕平打發時間，日前更攞正牌做好友陳智燊電燈膽，偕宋熙年一齊飯局，高Ling全程胃口極佳完全不覺尷尬。
藝人高海寧（高Ling）出名是宅男女神，身材極有睇頭的她俘虜不少男性，奈何近幾年感情一片空白，恨拍拖的她開到口叫好友陳智燊（Jason）介紹男友。暫未有愛情滋潤的高Ling，最近生活亦相當dry爆，早前便撞見她相約了一名女友人，雙雙前往九龍的商場濕平打發時間，穿着白色背心加黑色長褲的高Ling，豐滿上圍呼之欲出非常逼爆，期間見她與友人於該處名店穿梭時，更一度邊行邊挺胸收腹，驕人身段即時引來不少途人目光，兩人最終沒甚斬獲，索性往附近餐廳醫肚。
絲毫不尷尬
怎料，相隔幾日又發現高Ling出動，今次並做了好友電燈膽，當日晚上約九時許，發現她相約Jason飯局，同行還有Jason女友宋熙年，他們選擇了在灣仔歎日本菜，雖然夾在一對情侶中間，高Ling絲毫不感尷尬，全程不知幾好胃口，結果食了足足近兩小時才埋單，之後Jason往取車接載兩女離開，上車時高Ling識趣地自行坐後座，而Jason則有風度地為女友開車門，眼見好友如此恩愛，難怪女神愈來愈心急搵另一半。
文、攝：追蹤組