林欣彤谷事業線：大方啲
歌手林欣彤昨日罕有以性感低胸吊帶裙出席品牌活動，露近三吋長事業線，即時搶去同場的薛凱琪與陳瀅風頭。一向清純的林欣彤被問是否轉行性感路線？她說：「唔係呀，條裙係大會安排，我尋日知，好多謝佢咁睇得起小女子身材。健康咪得囉，應該大方。（最性感一次？）我諗係，係最deep一次。（底線？）差唔多啦，仲有咩底線？reach喇，大露背ok，透視就要睇吓透咩，要打番個底。」
薛凱琪傷聲帶
薛凱琪則透露最近忙於錄新歌，卻發現聲帶出問題：「睇耳鼻喉醫生，照話我聲帶有好多問題，條聲帶扭曲，正常偏白色我就紅色，又一長一短，仲有我胃酸倒流去個發聲位，用聲過度，疲勞過度。醫生話最好抖三個月，但冇可能。我決定戒講，都難，本身鍾意講，會盡量講少同笑少。（身體咁多問題，叫Paco搵人睇吓風水？）我覺得係風水太好，所以太多做先會聲帶疲勞，我會食一個月藥減少胃酸倒流，盡量唔拖慢出碟進度，助手有提我唔好太興奮。」
