潘源良作品展 神聖任務冧珍妹
著名填詞人潘源良（潘Sir）將於六月舉行作品展，他表示當初邀請一眾歌手時，大部分人都馬上答應演出，可謂一呼百應！不過，曾獻唱潘Sir作品《愛與痛的邊緣》的王菲未能撐場，潘Sir爆阿菲正籌備復出個唱。潘Sir又預告女友李麗珍（珍妹）有機會現身支持，並大賣關子，表示屆時將有神聖任務！
潘源良昨日邀得好友倫永亮（Anthony）與他齊任電台節目嘉賓，Anthony帶來一件黑色配金色的閃閃戰衣給潘Sir，預祝其六月假紅館舉行的一連兩場《最愛潘源良是誰作品展》大賣！Anthony表示很高興為潘Sir作品展任音樂總監，希望幕後人做多點作品展。
嘉賓爽快應承
潘Sir作品展嘉賓陣容強勁，問是否有很多歌手自薦演出？潘Sir說：「我絕大部分都自己聯絡咗，所以唔關自薦嘅問題事，同埋都好欣賞佢哋好多個都一口應承。」他又透露每晚會有神秘嘉賓現身。王菲經典歌《愛與痛的邊緣》是由潘Sir填詞，問潘Sir有否邀請阿菲任嘉賓？他指阿菲正籌備復出演唱會：「我喺佢經理人公司度得到呢個回覆，唔係同佢直接聯絡。」
愛心湯水滋潤
提到女友李麗珍，潘Sir表示有邀請她出席，又謂獲對方煲愛心湯水。問潘Sir會否在作品展中開金口？他笑說：「我唔會趕客嘅！同埋我有個神聖任務。（求婚？）唔係，到時喺現場講畀大家聽！」
本報昨曾聯絡王菲經理人，她承認阿菲沒空出席潘Sir作品展：「佢好多工作，又喺錄音室錄緊音。（出碟？）錄音唔一定出碟嘅。（搞復出演唱會？）唔講喇。」
文：音樂組