好戲拍檔紛紛力撐
歌手王菀之（Ivana）成為今屆金像獎焦點，一口氣憑三部電影《Delete愛人》、《分手100次》及《金雞ＳＳＳ》角逐「最佳新演員」，圈中人也紛紛開腔力撐她攞獎，有份憑《金雞ＳＳＳ》爭影后的吳君如亦睇好拍檔Ivana，她說：「冇得輸呀，我瞓身撐佢！」
《Delete》片的男主角王祖藍，當然希望對方憑該片贏新人獎，又大讚Ivana是個有天分的演員：「除咗佢獨特嘅喜劇節奏感外，佢做感情戲都來得好真摯，所以呢套戲佢係有笑有淚，演繹做得好好，期望佢有機會攞獎。」至於周秀娜則盼Ivana憑合拍的《分》片奪獎：「梗係希望『瑞記』攞啦，戲中佢做一個敢愛敢恨嘅女子，演出好絲絲入扣，同佢一齊拍戲好舒服！」