鎮宇 華哥變態搭膊
吳鎮宇、任達華、譚耀文、姜皓文（黑仔）及英皇老闆楊受成等，昨晚出席英皇電影《衝鋒車》慶功宴，慶祝該片上映以來票房直逼900萬，內地票房則達2000萬人民幣，眾演員齊齊開香檳，楊生更不時搭住鎮宇及華哥密密斟。
夾攻甩底基仔
被指不咬弦的鎮宇與華哥前後腳到場，甫見面態度即180度轉變，搭膊頭又頻頻碰杯，還聯手對付身在內地工作甩底的古巨基，華哥笑謂：「唱歌大晒咩，忙就大家都忙！」鎮宇亦謂：「我都喺西貢趕嚟啦！呢期喺內地拍緊戲，但講咗要嚟慶功，咪叫劇組落嚟拍囉！咁如果佢哋要慶功，我可唔可以唔見人先？」同樣由內地返港的華哥亦大表認同，還笑指以回鄉證作證，着大家翻查出入境紀錄，他慶功翌日即要返內地報到。
對於劇組有意原班人馬開拍續集，兩人異口同聲讚好：「我哋都要以德報怨，基仔唔喺度都會預佢嗰分。」及後又你一言我一語揶揄基仔，鎮宇謂：「佢返嚟拍戲咪要申請工作證，移居內地？」得悉基仔於內地出席品牌活動，華哥反問：「點解唔畀衫我哋？拍戲時佢有送電話套畀我哋，唔爛嘅，電話就唔包，仲拎過糯米飯去現場萬歲o架！不過佢又唔食，可能食肥咗我哋會冇得做啦！」
阿譚與黑仔則指拍攝時乃人生體重高峯期，分別達160磅及185磅，拍畢已積極減磅，現一同減至148磅左右，談到他日前公開表示想生女，已為人父的阿譚稱可轉贈天書，還建議多吃朱古力，黑仔謂：「一陣要買番排放床頭，墊喺枕頭底，如果到時生仔咪再生過囉！」