蔡楓華蒲頭 開金口撐亞視
即將「光榮結業」的亞視舉辦大型金曲節目錄影，嘉賓之一蔡楓華透露有意舉行個唱，且計劃唱到「賭城」拉斯維加斯，又豪氣表示今次出席撐亞視，並非為車馬費，認真巴閉！今次錄影獲「亞洲會」冠名贊助數十萬，扣除開支亞視成功「開源」。
只餘不足一年「壽命」的亞視繼續掙扎求存，昨晚更集齊以往合作過的藝人，包括蔡楓華、李龍基、李影、梁天、黎燕珊及魏秋樺等，錄影節目《亞洲會呈獻：ATV歲月如歌大賞》，且頒發獎項向樂壇前輩如填詞人盧國沾及音樂人黎小田等致敬，司儀之一張家瑩悉心打扮露事業線搶鏡。
租車費西餅唔慳得
失蹤一段日子的蔡楓華以黑超look現身，表示會趁機唱自己過往主演的劇集《IQ成熟時》及《青春三重奏》主題曲：「好多年冇返過嚟，今次好有意思。（有冇車馬費呀？）今晚會攞獎，返嚟撐亞視，冇諗過錢。（亞視稱有二千車馬費。）嚟緊會開演唱會，內地有30幾場，美國拉斯維加斯都有，香港最多一、兩場，有消息再話畀大家知。」
高層葉家寶受訪時被追問有關昨晚製作費的問題，他承認一切開源節流，即使搭台亦用舊有材料，嘉賓演出一概「拍膊頭」，只得接載嘉賓的租車費「唔慳得」，而記者室亦設有西餅招呼記者。家寶又謂明天會與台前幕後開大會，以聽取員工訴求，不過對於亞視前景仍未有最後定案。據悉「亞洲會」昨晚冠名贊助了數十萬，且買下節目版權，而扣除一切開支，餘額將撥作亞視收入。
建議租借廠房賺錢
前亞姐黎燕珊表示自己推掉5位數字酬金工作，以亮相昨晚錄影以表支持；同場的製作人黎文卓則建議亞視搞「亞洲劇場」，租借廠房給劇團或公開團體表演授課賺取營運資金：「冇咗個牌都可以轉型做網絡電視嘛。」
文：影視組