《無敵安樂窩》（Home）故事講及頻頻走佬避敵的波波星部族把地球據為己有做新居，被逼遷的女主角小貼意外地與媽媽分開，而人緣麻麻的波波星人Ｏ仔同時搞出大頭佛，令地球面臨被滅危機，避禍之際認識了四處尋親的小貼，鬥氣冤家鬥出友誼聯手解難。
故事題材豐富，友情、親情與歷險集於一身，特別於少見於動畫的求同存異精神，卡通公仔親切又發人深省。出身於巴巴多斯的小貼移居後未能融入社會，而Ｏ仔就因好奇心重，有別於安分的族人而被嫌棄，兩顆寂寞的心相知相遇，誤打誤撞互相治愈兼成長，忠於自己的正能量正好培養小朋友的自信。
被設置為穩陣派的波波星人理性到做事前先計算成功率才出擊，否則即時走佬，加上獨立又未有倫理感情，故認為人類心存希望或為一家團聚，雖明知不可為而為實為死蠢，末段被感化一幕值得大人細路反思情感的能量。撇開大道理，全片不少令小朋友捧腹大笑的撞板搞笑位，略嫌前段平鋪直敍，但結尾感人又刺激。小貼由同鄉歌手Rihanna配音夠噱頭，但由她親作的流行曲就有點格格不入。題外話，片中不時中招搞到損手爛腳的嘉路似足《97家有囍事》的大哥，星迷可能甚感親切。
文：常歡