鍾浠文嘴刁刁歎私房菜
模特兒鍾浠文（Zelia）自細食得嘴刁，對「綠」色蔬果厭棄，偏食令媽媽大感頭痛，Zelia說：「都唔知點解，冇得解釋，媽咪打到我飛起都冇用，都係只食肉，不食綠色蔬果。」長大後，為了食得健康，她亦慢慢愛上「綠」色生活，現時每餐都要少肉多菜！
近期Zelia愛上私房菜，對「新寵」潮洲私房菜林家御廚讚不絕口，笑言一試難忘：「佢哋每兩個星期換新菜單，有新鮮感，加上有肉有海鮮亦有菜，營養剛好，合乎我健康標準。尤其是潮式金不換炒蜆仔肉生菜包，令我食欲大增，又唔易肥。而秘製滷水鵪鶉釀鵝肝鵝腎嘅滷水味道喺出面食唔到，至於四菇鮑汁燜鯊魚皮，呢個菜式喺出面亦好難搵到，最重要係有養顏效用！」
由於私房菜私密度高，菜式夠特別，啱晒自嘲有選擇困難症的Zelia：「我成日出外用膳，一攞住餐牌都唔知食乜好，私房菜最好就係預先幫客人安排好，等我食得無憂又開心。」自認食得挑剔的她常與一班好姊妹組成靚女美食團周圍搵食，試完還會畀意見！
服裝：maje
攝影：張福宏
場地：潮洲私房菜林家御廚（跑馬地）